Bulok ug baruganan

Nahimong puno karon ang mga newsfeed sa mga nagkadaiyang mga bulok agi’g simbolo sa mga politiko ug partido nga gisuportahan. Pink alang kang Leni, green sa mga Duterte ug ni Bato ug pula kang Marcos. Ang nakalingaw kay daghang mga tawo ang nag-away ug buot mopadayag sa ilang mga panahom.

Matingala lang ta kay kaniadto nga maglisod gani og sabot kun nganong kining mga hilomon sabaan naman kaayo karon. sabaan tungod kay nabayran? Sabaan tungod kay nahimong naundan na ang utok. Ambot lang pud. Ang paggamit sa termino nga Nanay mora’g makapanuway sa uban nga malipayon kaayong mosangpit sa ilang giidolo og Tatay. Character assassination maoy nahimong uso karong mga higayona.  Ambot lang kaha kun human sa bugnong lugaynon puhon mamahimong mahinumdoman paba ang imong pakigbisog sa imong giidolo?

Ang sinugdanan nga maningkamot ang taglawas gyud. Dili maayo nga isalig ang kaugalingong kaugmaon sa mga tawo nga nindot paminawon ang mga pulong ug pasalig. Basin sa kaulahian mamahimong dakong urom ang tanan. Ingon ini lang gyud ba ang trending ning panahona?

Laing kataw-anan mao nga kadtong nabilanggo tungod sa pangawkaw og milyones ang nahimong gawasnon ug karon nia nilansar na pud ug mapahiyumon pa? asa naman diay ang kauwaw?

Ning panahon sa dakong kalisdanan kinahanglang kauwaw mahanaw!

Daghan ang dili na lang buot mogamit sa hustong pangisip tingali kay kapoy na kaayong maghunahuna. Apan bisan kun  kapoy na angayan lamang nga kita maghunahuna kay kun dili kita makahimo niini nan, malisud ug walay tinong padulngan ang atong kinabuhi.

Atong i-ampo sila sa atong pag-ingon:

Makagagahum ug tunhay nga Dios anaa sa imong mga kamot ang mga kasingkasing ug katungod sa imong katawhan.

Sud-onga ang mga anaa sa gahum. Pinaagi sa imong pagtabang ug sa ilang pagpangulo, madangat unta namo ang kausbawan, ang matuod nga kalinaw, ang kagawasan sa tinuohan. Kini among gipangayo pinaagi Cristo among Ginoo. Amen….Hinaut pa unta.