Dili dautan ang mamahimong adunahan apan...

Oktubre 10, 2021: Ikakawhaag walo nga Domingo sulod sa tuig

Mga Pagbasa: Kin. 7;7-11/Sal. 90/Heb. 4;12-13/Mk. 10;17-30

Dunay mga higayon nga malisod lang gyud ang pagbiya niini labina kun alang nimo anaa na ang imong seguridad. Ang batan-on sa atong ebanghelyo karong Dominggoha dunay nakita nga kuwang pa gyud sa iyang kinabuhi. Ang iyang kinabuhi bisan anaa na niya ang tanan haw-ang lang sa gihapon. Makaingon ta nga maayo siyang tawo ug may tinguha nga magpuyo sa kinabuhing balaanon.

Mao nga sa kang Jesus siya nagpakisayud. Si Jesus sa iyang pagkakita sa nahisgotang batan-on ang nipadayag sa iyang dakong gugma niini mao nga iya kining gihagit nga biyaan ang iyang mga katigayonan, ibaligya kini ug ang halin ihatag ngadto sa mga kabus. Sa pagkadungog sa maong batan-on nibiya siya ug nitalikod nga luya tungod kay dili pa siya andam ug dili pa niya mahimong talikdan ang kinabuhi nga iyang naandan.

Dunay mga hinungdan kun nganong nabuhat kini sa maong batan-on. Ug mahimong tungod sa:

- 1.   Seguridad sa iyang kaugmaon. Malisod ang pagbiya sa kinabuhi nga naandan ug diin siya haom kun iyang mahimo.

- 2.   Ang kahadlok kun makaya ba niya ang maong hagit. Basin ug mao kini ang hinungdan kun nganong mapakyas na pud ang iyang tinguha nga mamahimong hingpit diha sa kinabuhing espirituhanon.

- 3.   Buot niya ang kahingpitan unsaon naman lamang kun dili niya makuha ang gitinguhang kahingpitan?

Malisod ang pagrisgo. Apan kun motuo kita nga dunay grasya, nan, mamahimong dili imposible ang tanan. Ang tanan mahimong possible diha sa Dios. Dili dautan ang mamahimong adunahan apan kun sa bahandi kita maulipon nan, lahi na pud kana nga sugilanon.