Tapok sa rehistro

Wala na masunod ang social distancing sa mga tawo nga nagtapok sa pagparehistro sa dakbayan sa Talisay samtang mibahad ang pamunoan sa lokal nga kagamhanan sa dakbayan sa Lapu-lapu nga ilang pahunongon ang pagpangrehistro sa Comelec kun dili masunod ang health protocols.

Sa kaulohan, miangal na ang mga tawo nga buot magparehstro sa Comelec tungod sa kalangay ug kakuwang sa sistima nga gipatuman. Ang uban nangreklamo tungod sa kadaghan na nilang higayon nga nagbalik-balik aron lang marehistro. Mao ni ang mahitabo sa mga tawo nga mahilig sa deadline.

Kun nagparehistro pa sila niadtong mga panahon nga layo pa sa deadline hayahay unta ang ilang kinabuhi sa pag-adto sa buhatan sa Comelec tungod kay dili man daghan ang magparehistro. Dili unta sila mag-agwanta sa kahuot ug layo pa gayod sa posibilidad nga matakdan sa COVID-19.

Karon ang kataposang adlaw sa pagpangdawat sa Comelec niadtong buot nga magparehistro Kay mahilig sa deadline, dako na hinuon ang posibilidad nga dili sila marehistro.

Hinuon, aduna pay kahigayonan nga marehistro ang mga langayan sa pagparehistro, kana kun mapirmahan ni Presidente Rodrigo Roa Duterte ang balaudnon nga nag-ong-ong karon sa Kongreso nga naglugway sa rehistro hangtod sa Oktobre 31 o sunod buwan. Kun ugaling malugwayan ang pagpangrehistro, ayaw na mo paglangay-langay.

* * *

Gisab-it na ni Senador Manny Pacquiao ang iyang gloves sa boksing. Buot ipasabot nga moundang na siya sa boksing. Apan tininuod gyod kaha ang iyang pag-undang sa boksing? Dili lamang kaha for the maintime lang tungod kay magpapili siya pagka-presidente sa nasud?

Kun palaron sa iyang ambisyon ug pagnabigar paingon sa Malakanyang basin og hingpit na gayod ang pagbiya ni Senador Manny Paquiao sa larangan sa boksing. Apan kun dili, dili layo ang posibilidad nga mobalik ra gihapon siya niini.

Ang determinasyon ni Pacqiao sa pagsungkit sa Malakanyang susama sa iyang dterminasyon sa paglangkat sa mga bakus sa kampyonato sa boksing. Apan dili pariha ang boksing ug politika.