_banat
^

Banat Opinyon

Pilia gyud ang maayong driver

RENBOR PATROL - Rene U. Borromeo - Banat

Gidawat ni Senador Manny Pacquiao ang pag-awhag sa mga sakop sa PDP-Laban-(Pimentel Wing) nga siya maoy mokandidato sa ilang partido sa pagka presidente sa nasud sa eleksyon karong sunod tuig.

Atol sa ika-11 nga national assembly sa mga sakop sa PDP-Laban Pimentel wing nga gihimo sa online kagahapon, ilang giendorso si Pacquiao nga maoy ilang kandidato pagka presidente.

Wa gyud magduhaduha si Pacquiao pagdawat sa dakong hagit alang kaniya nga modagan sa labing taas nga katungdanan sa nasud, ug kon modaog maoy modumala sa atong kagamhanan.

Bisan tuod og wa pa sila maka-file sa ilang Certificates of Candidacy sa Commission on Elections, apan duha na ang mipadayag nga modagan pagka presidente. Sila mao si Senador Panfilo Lacson ug si Pacquiao.

Ang uban nga gituohang modagan pagka presidente mao sila si Vice President Leni Robredo, kanhi senador Bongbong Marcos; Manila Mayor Isko Moreno, ug bisan gani si Davao City Mayor Sara Duterte.

Ang atong Konstitusyon naglatid nga kadtong molansar pagka presidente kinahanglan nga 1.) natural born citizen sa Pilipinas; 2.) registered voter; 3.) makamao nga mobasa ug mosuwat; 4.) labing menos 40 ka tuig; ug nagpuyo sa nasud sulod sa labing menos 10 ka tuig.

Dili kwalipikasyon sa usa ka kandidato ang iyang educational attainment, ang iyang work experience ingon man kon kwartahan o pobre ba siya.

Sa ato pa, si Pacquiao kwalipikado gyud nga modagan pagka presidente sa nasud.

Dili ikalimod nga sa kasikat ni Pacquiao, mahimong inilog siya nga kandidato ug hayan lupigon pa niya ang uban nga nangambisyon sa pagka presidente.

Kon mahibaw-an na nato kon kinsa gyud ang mga mokandidato pagka presidente, diha na nga higayona nga kitang katawhan, angay’ng motimbang-timbang na kon kinsa ang atong palingkoron sa Malacañang.

Basta ang akong ikasulti mao kini. Hunahunaa nga ang usa ka presidente maoy driver sa bus nga atong sakyan, ug ang bus mao ang atong nasud.

Kinahanglan nga kitang katawhan, maniguro nga ang palingkoron nato sa Malacañang nga maoy mo-drive sa  bus nga atong sakyan, usa ka maayong driver.

Kay kon mosipyat kita pagpili sa driver sa atong bus nga sakyan, basin og madam-ag ang bus ug kitang tanan mangamatay kon mahulog kita sa bung-aw sa dakong kasaypanan sa pagpili.

Tan-aw nako, si Mayor Sara Duterte usa gyud sa lig-ong kaatbang unta ni Pacquiao, apan unsaon nga si Presidente modagan pan sab pagka bise presidente.

Si Inday Sara dili gusto nga duha sila ka Duterte ang magpapili sa labing taas nga katungdanan sa nasud, mao nga daghan karon ang nanawagan kang Digong nga moatras na lang siya sa iyang tinguha.

PDP-LABAN
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with