_banat
^

Banat Opinyon

Pakyas nang daan

BALITAHOM - Atty. Jose Marie N. Poblete - Banat

Nagkinahanglan ang DepEd og dugang P33 bilyones kon buot nga hataga’g laptop ang tanan’g magtutudlo nga magamit sa distance learning scheme nga gisagop tungod sa COVID-19 pandemic.  Lain’g P4 bilyones usab ang gikinahanglan alang sa data connectivity.  Magtutudlo pa lang ang buot gahinan sa maong budget ug wala pa’y hisgot sa mga tinun-an kinsa mas labaw nga nanginahanglan, apan makabungog na ang kadako niini. Dili ba mahimong dunganon pag-atiman sa DepEd ang panginahanglan sa magtutudlo og tinun-an?  Ginaingon baya nga “Kadtong wala masayod kon unsa ang mahinungdanon sa ilang pag-alagad, pakyas na’ng daan sa iyang pagpangalagad” Isip-isip!

Padayon ang enrollment

Gipahibalo ni DepEd Undersecretary Revsee Escobedo nga dawaton pa sa mga publikong tunghaan kadtong naawahi sa pagpa-enrol hagtod sa Septyembre 30, 2021.  Masaligon ang mga namunoan sa DepEd nga malabwan pa ang gidaghanon sa mga estudyante sa miaging school year 2020-2021.  Gipasiatab lang sa DepEd ang gidaghanon sa enrollment apan tak-om ang ilang baba kon ang ka-epektibo na sa distance learning scheme ang hisgutan. Ang paglugway sa adlaw sa enrollment, makapahinumdum sa giingon’g advertisement sa usa ka unibersidad     nga “Enrollment still going on.  Classes never mind.”  Madahaaan!

Kleriko nga daw opisyal

Mipasaka og kaso nga cyberlibel si Senador Manny Pacquiao batok kang Pastor Apollo Quiboloy tungod sa giingon’g pagpakatap og sayop ug bakak nga inpormasyon nga nakamansa sa kadungganan ug reputasyon sa senador.  Nagpasiatab kaniadto si Pastor Quiboly nga makapahunong siya sa mga katalagman sama niadtong pagmando niya sa linog nga mo-STOP.  Ni’ng higayona, ambot kon ma-STOP ba ang kaso nga gisang-at batok kaniya.   Matud pa bitaw ni Pope Francis, “Ang katawhan sa Diyos nagkinahanglan og mga pastor, ug dili mga kleriko nga naglihok nga daw mga opisyal sa gobyerno.”  Fezteleern!

Sa buhat ug sa pulong

Nasayran nga walay misanong sa panawagan sa Philippine General Hospital sa mga bag-ong doktor nga mo-apply sa maong hospital aron makatabang pag-atiman sa mga COVID patients.  Kagamay sa sweldo maoy gituohan’g hinungdan sa pagdumili sa mga doktor.  Dili tingale nato mapugos ang mga doktor apan dili malalis nga ni’ng panahona, sila ang labing gikinahanglan.  Adunay panultihon nga “matam-is ang pag-alagad sa nasud pinaagi sa mga buhat, apan dili usab binuang o kataw-anan ang pag-alagad pinaagi sa pulong.”  Mao tingale nga naay sundalo ug naa pud mga politiko.  Pagkatoytoy!

Tago hangtud makalimtan

Mipadayag sa ilang pagsupak ang UP-Diliman Executive Committee sa nominasyon ni Secretary Roque isip miyembro sa International Law Commission sa UN sa rason nga dili maayo’g agi si Sec. Roque sa natad sa pagpanalipod ug pagpatigbabaw sa tawhanong katungod.  Tataw nga adunay mga kritiko ang kalihim.  Apan angayan hinumduman nga dili tanan’g kritiko nasilag sa ilang gisaway; ang uban niini nagsulti lang sa tinuod.  Hinuon, adunay tambal aron dili na sawayon:  Mopadaplin ang Kalihim ug dili na magpakita hangtud nga makalimtan na siya sa katilingban.  Kaya ba?

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with