_banat
^

Banat Opinyon

Eksperimento taliwa sa pandemya

ARANGKADA - Leo Lastimosa - Banat

Hinaut nga may makabadlong ni Presidential Spokesperson Harry Roque sa di pa niya isunod pagtulisok ug pagkasaba si Dr. Rabindra Abeyasinghe, representante sa World Health Organization (WHO) sa Pilipinas.

Kinsa, sama ni Dr. Maricar Limpin, presidente sa Philippine College of Physicians (PCP), niawhag nga ipadayon ang hugtanon nga pagbantay batok sa nagsulbong nga mga kaso sa COVID-19. Sama ni Limpin, nipasidaan sab si Abeyasinghe nga ang pagdalidali sa pagpaluag sa mga lagda sa Metro Manila mahimong makapaawas na sab sa mga pasyente ug hingpit na nga makapahagsa sa mga ospital.

* * *

Nabalaka mi nga ang bugtong rason nganong wa dayon masaboni si Abeyasinghe, gawas nga gisukwahi niya ang linya sa pamunoan ni Presidente Rodrigo Duterte atol sa programa sa Malakanyang live sa nasudnong telebisyon, lahi sa pagsinggaak ni Roque nga gipakaingon niya nga way laing makakita, mao nga si Roque nahigot sa New York kay nangaplay og trabaho sa United Nations.

Hinaut nga way laing taphaw nga opisyal sa administrasyon nga mopunit sa dunot niyang kawsa sa pagsalikway sa mga eksperto ug siyensiya pabor sa pamolitika ug way kapuslanang pamostura.

* * *

Si Abiyasinghe nga labihan kamabinantayon sa iyang sinultihan, wa gani mopalabay sa bisan unsang kahigayonan sa pagdayeg sa administrasyon dihang nakatsamba sa ilang pagduma sa pandemya, wa kapugong sa pagpasumbingay unsa kabinuang ang paglibkas sa Malakanyang sugod ugma sa MECQ sa Metro Manila aron pulihan og granular lockdowns.

Matud ni Abiyasinghe di makatabang ang pag-usab-usab sa mga termino kon dili ang pagpabilin sa hugot nga mga lagda aron di mosamot pagsulbong ang mga kaso.

* * *

Sa laing eksperimento nga mahimong ipatuman sab sa Sugbo ug ubang bahin sa Pilipinas, mangawot sa bisan di katol ang mga mayor sa Metro Manila sa pagpili unsa sa upat ka alert levels ang labing haom nga ipatuman sa kada kapilya, sitio, compound, subdivision, purok ug eskina sa ilang hurisdiksiyon nga managlahi og mga kaso sa COVID-19.

Mao nay sayon nga bahin sa ilang trabaho. Mas lisod ang pag-andam og pagkaon, tambal ug ubang inadlawng panginahanglan para sa tanang pamilya, kansang mga sakop di makagawas, atol sa kinatibuk-an nga granular lockdown nga molungtad og 14 ka adlaw o mas taas pa.

* * *

leolastimosaa@gmail.com

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with