Nagpabaya sa trabaho

Wa malilong kanato nga dugay na nga gibalik ang pagpabiyahe sa mga public transport, sama sa mga public utility jeepney.

Samtang gitugotan nga makabalik pagbiyahe ang mga public transport apan gimando nga ipatuman gyud ang social distancing sulod sa mga sakyanan.

Gawas nga mag-social distancing, gimando nga butangan gyud og transparent plastic ang kada luna nga gitagana aron anha molingkod ang mga pasahero.

Gituyo kini aron nga dili gyud magdikit ang mga pasahero ug malikayan ang pagtinakdanay kon pananglit dunay makasakay nga positibo sa Coronavirus Disease.

Apan ang nahitabo karon, samtang duna man tuo’y plastic nga gibutang, apan way gipatuman nga social distancing ug nagsikit ra gyud ang mga pasahero.

Dili ko motuo nga mga buta ang mga gitugyanan sa pagpatuman niining maong kamandoan? Dinhi sa Cebu City, dili buta si Konsehal James Cuenco nga maoy chairman sa Committee on Transportation sa City Council. Labaw pa nga nakasiguro ko nga dili buta si LTFRB Regional Director Eduardo Montealto nga wa makakita sa maong talan-awon.

Dili kaha kini maoy rason nga misaka pag-ayo ngadto sa 3,187 ang mga kaso sa COVID-19 dinhi sa Cebu City?

Akong isugyot nga ayaw na ninyo padagana ang mga public utility vehicles nga wa motuman sa kamandoan.

Akong awhagon si Mayor Edgar Labella, Vice Mayor Mike Rama, Konsehal Joel Garganera ug Dave Tumulak, nga aksyoni ninyo kini sa labing dali nga panahon.

* * *

Ang mga supporters ni Presidente Duterte pagdagan niya sa eleksyon kaniadtong 2016, karon miawhag na kaniya nga dili modayon sa iyang tinguha nga molansar pagka bise presidente sa 2022 elections.

Sa akong pagtimbang-timbang, husto ang gihimo sa mga supporters ni Presidente Duterte. Maisip na nga hinangol sa katungdanan sa kagamhanan kon modayon siya pagpapili pagka bise presidente.

Kon iya kining himoon, sigurado ko nga mapilde siya kay daghan sa iyang mga supporters ang dili na gyud mopaluyo kaniya karong umaabot nga eleksyon.

Ang maayong himoon ni Presidente Duterte, taposon na lang niya ang iyang termino ug hingusgan ang kampanya batok sa ilegal nga drugas nga maoy gisaad niya nga sumpoon, mao nga gipadaog siya sa katawhan.

* * *

Naikag ko sa gitug-an ni Bryner Diaz, acting chief sa Cebu City Cultural and Historical Affairs Commission (CHAC), nga may nakita silang karaang taytayan taliwala sa kakahoyan ubos sa Marco Polo Hotel sa Lahug.

Ang dakong tulay nga gihimo sa semento, anaa sa kakahoyan ug way karsada sa maong dapit. Atangi ang pag-follow up nato niining maong isyu.