Speed limit makalangat

Tungod sa daghang dugoong disgrasya nga nahitabo sa karsada, diin ang gituohang hinungdan mao ang sobra kakusog pinadaganan sa nagmanehong drayber, nahimugso ang Cebu City Ordinance No. 2621: “An Ordinance Providing for the Speed Limits for All Kinds of Motor Vehicles Within the Territorial Jurisdiction of the City of Cebu” nga giumol ni Konsehal Raymond Alvin Garcia.

Matud pa ni Cebu City Traffic Office (CCTO) Spokesperson Paul Gotiong, ang speed limit nga gitugot sa mga sakyanang moagi sa Cebu South Coastal Road (CSCR) kutob ra gayod sa 60 kilometers per hour.

Ang molapas, dakpon!  Ug may dakodakong silot nga sagubangon: P2,000 nga multa ug seminarog upat ka oras sa unang kalapasan; P2,500 nga multa ug another four hours’ seminar sa ikaduha; ug kon makatulo na, dili kay makabayad lag P3,000. Kondili, i-impound na gayod ang sakyanan.

Ang pangutana mao: Makagarantiya ba ang maong speed limit nga ordinansa, nga wala nay mga magsinungayay’ng aksidente sa kadalanan nga usahay mosangpot hangtod ngadto sa kamatayon sa drayber o pasahero?

Base sa mga natalang dugoong panghitabo sa kadalanan, sagad irason sa mga drayber mao: nga nawad-ad kunog brake ang bus, van, SUV ug uban pa nga ilang gimaneho, or nakatulog o nakapiyong sila samtang nagmaneho.

Dili, ba? Nga sa ato pa, ang tuboran sa suliran, wala sa gikusgon sa pagpadagan. Kondili, anaa sa drayber ug sa kondisiyon sa sakyanan.

Kay kadto lang sikat nga drayber kanhi sa CBC bus nga ginganlag Kulas, kinsa bisag anaa sa Manipis, dalan nga igo rang masugatan og usa ka trak, unya nag-umbaw pa sa lawom kaayong pangpang ang naglikolikong dalan, pastilan, haskang kusoga mopadagan.

Kuhaon lang god og usa ka oras kapin ang biyahe gikan Balamban hangtod Cebu City.

Pero dili gyod mahadlok ang mga pasahero mosakay niya. Siyay pirmeng pilion.

Kay tulin man tuod mopadagan, pero septi kaayog dinad-an. Hangtod meritiro na lang, wala gyod makaagig disgrasiya.

Laing pagmatuod, nga ang hinungdan sa disgrasya, dili ang kakusog kaayo sa dagan sa sakyanan. Kondili, anaa sa nagpadagan ug sa kahimtang sa sakyanan.

Hinungdan, nga daghang biyahedor ang wala makauyon nianang 60 km/hour speed limit ordinance sa CSCR. Kay makahatag lang kinig dugang kalangay.