^

Banat Opinyon

Ipa-audit ang Red Cross

BALITAHOM - Atty. Jose Marie N. Poblete - Banat

Buot ni Presidente Duterte nga ipa-audit usab sa COA ang Philippine Red Cross (PRC) human niya akusahi si Senador Richard Gordon nga migamit sa maong ahensya isip “gatasan”. Non-government ug non-profit nga ahensiya ang PRC busa kwestiyonable pa kon maka-audit ba ang COA niini. Tataw nga sumbalik ngadto sa senador kini’ng panawagan sa Presidente sa COA.  Niini’ng paglabayay nila’g lapok sa usag-usa, haum ang panultihon nga, “Ayaw gayod sulayi pag-gubâ ang kadungganan sa uban pinaagi sa BAKAK, labi na kon mahimong gub-on usab ang imong kadungganan pinaagi sa KAMATUORAN”.  Hala no!

Balaod sa mga ligdong

Gihulagway ni Senador Lacson, nga usa ka gusbat nga nasud ang Pilipinas kon padayon nga magdumili ang kagamhanan pag-angkon nga adunay iregularidad sa pagpamalit sa giingon nga “overpriced” nga mga PPE.  Naghitak nga kurapsyon taliwala sa kalisod sa katawhan ang nag-una’ng hinungdan sa giingon ni Senador Lacson nga nahugno, nagun-ob ug nahunlak nga kahimtang sa nasud.  Sakto ang panahom nga “Walay pulos ang atong balaod kay gipunting man hinuon kini ngadto sa mga ligdong, apan dili kini makadulot sa mga badlongon sa katilingban”.  Nagkagidlay na!

Gastohon ang “deficit”

Gikasagmuyo sa COMELEC ang pagpakunhod sa budget sa maong ahensiya sa tuig 2022 kay kini maka-apekto kuno sa ilang gilaraw nga mga gimbuhaton sa pagpahigayon sa piniliay sa sunod tuig.  Kapakyas sa COMELEC pagpresentar sa ilang plano ngadto sa Kongreso ang hinungdan sa paglaslas sa pundo. Ang budget igo ra’ng magtug-an kon unsay dili makaya’ng paliton apan dili makapugong kon ugaling paliton kini.  Dili man kinahanglan nga mogasto tungod lang kay naay pundo.  Basin baya mahisama na hinuon sa Presidente nga sa dihang gipahibawo nga nagkadako na ang “budget deficit” sa nasud, mimando gilayon nga gastohon na ang maong “deficit”.  Madahaaan!

Mag-kutsara inay mag-kinamot

baniog karon ang pagdaug sa taga-mandaue sa P120.6 milyones nga jackpot prize sa 6/55 Grand Lotto.  Hayan mobalik na usab ang kadasig sa pagpanugal sa lotto bisan pa man sa pagya nga “mas dako ka pa’g kahigayonan nga ma-igo sa kilat kay sa makadaug niini”.  Lisod nga bisyo ang pagkasugarol kay makaut-ot kini sama sa gidangatan sa akong higala.  Kaniadto sa dato pa siya, magkinamot siya kon magkaon, apan karon nga naut-ot na, mag-kutsara na gayod siya.  Sa una, adobo ug humba man ang iyang pagkaon busa mahimo ra’ng kinamoton; apan karon, lugaw-lugaw na lang intawon, mao nga kinahanglan kutsara-on.  Pagkatoytoy!

Nagkayamokat nga programa

Aron pagdasig sa katawhan nga magpabakuna batok COVID-19, gilusad sa nasudnong kagamhanan ang programa’ng “Resbakuna Bakunado Panalo” nga maghatag kahigayonan sa mga nabakunahan na nga makadaug sa premyo nga mokabat 3 milyones ka pesos.  Nagkadaiya ug dili tiaw ang mga suliran pagpatuman sa programa sa pagpamakuna: gikan sa kakulang sa suplay ug hangtod na sa kahadlok sa uban nga magpabakuna.  Tukma ug seryoso’ng solusyon ang gkinahanglan.  Dili pa-raffle nga daw hulbot-hulbot og paburot sa peryahan.  Nagkayamokat lang!

COA

Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with