May bag-o sa Minglanilla

Nanggawas ang mga T-shirt nga gipangsul-ob sa mga habalhabal ug tricycle drivers ingon man mga manindahay og kandila sa simbahan sa lungsod sa Minglanilla nga adunay marka nga “I Love Minglanilla Gusto Namo Bago.” Tungod niini, giingon matud pa, nga gimando ni Atty. Rajiv Enad, konsehal sa nahisgotang lungsod, ang pagsita sa mga nagsul-ob sa markadong T-Shirt. Labing seguro si Atty. Enad daan kay iya mang gipasita ang mga gusto og bago.  

Dako ang akong pagtuo nga ang mga T-Shirt nga nanggawas pasiuna lamang kini sa mga kalihokan nga maglambigit sa nagsingabot nga bugnong lugaynon karong Mayo tuig 2022.

Nagduda ko nga may bag-ong pangalan sa politika sa lungsod sa Minglanilla sa umaabot nga bugnong lugaynon ug ang ilang adbokasiya mao ang pagpaila og kabag-ohan sa lungsod.

Ang lungsod sa Minglanilla dugay na nga gidumala sa mga Selma ug mga kaalyado niini sa politika. Maong ang nagpaila og kabag-ohan sa Minglanilla mora’g gilad-an na sa mga tadhan sa politika sa nahisgotang lungsod. Kay gihigugma nila ang Minglanilla, gusto na nila bag-o nga pangalan sa politika.

Sa laing bahin, kay giingong gipasita ni Atty. Rajiv Enad ang mga nagsul-ob sa markadong T-Shirt, nahadlok siya sa bag-ong grupo nga posibling mosulbong? Nganong nahadlok man siya? Kay nisantop sa iyang hunahuna ug iya mismong gituohan nga silang mga daan mapulihan?

Dili krimen ang pagsulob og T-Shirt nga dunay marka nga “I Love Minglanilla, Gusto Namo Bag-o.” Nasayod kaayo niini si Konsehal Rajiv Enad kay siya usa ka abogado nga nasayod sa balaud. Apan samtang dili krimen ang pagsulob sa markadong T-Shirt apan ang pagsita usa ka matang sa pagpanghasi nga gidili ug usa ka matang sa krimin sa atong balaud.

Nakalatid sa atong batakang balaud nga ang matag usa kanato dinhi sa Pilipinas adunay katungod nga politikal nga dili puwede nga ibaliwala ni bisan kinsa bisan unsa pa siya ka gamhanan.

* * *

Happy Birthday Barangay Quiot, Cebu City Councilor Eduardo "Edie" M. Llamedo nga nagsaulog sa iyang adlaw nga natawhan karong adlawa. Gikan sa imong mga kauban sa konseho sa barangay.