Dako ang kuwarta sa basura

Gipaimbestigaran karon sa konseho sa siyudad sa Sugbo ang katingalahan nga nahitabo sa paghakot sa basura. Hinuon wala pa maklaro sa konseho kun unsa nga ahensiya sa gobiyerno ang ilang paimbestigaron aron maoy mohatag kanila og tubag sa daghan nilang pangutana sa paghakot sa basura. Plano sa konseho nga ilang paimbestigaran sa National Bureau of Investigation (NBI), Visayas Ombudsman ug Presidential Anti-Corruption Commission (PACC) ang problema sa basura apan gisugyot ni Bise Mayor Mike Rama nga usa lang ka ahensiya sa gobiyerno ang ilang paimbestigaron aron dali ra kining mahuman.

Una niini, gipahunong sa Environmental Management Bureau sa Department of Environment and Natural Resources ang operasyon sa transfer station sa Barangay Inayawan tungod sa ilang daghang nakita nga kalapasan sa balaud sa kalikopan.

Ang transfer station gipadagan kini sa RMI Solid Waste Management and Hauling Services samtang ang DOCAST Construction mao ang naghakot sa basura.

Ang kagamhanan sa dakbayan sa Sugbo migahin kini og P400 milyones alang sa paghakot sa basura alang sa tuig 2021. Apan ang Department of Public Services (DPS) nangayo kini og dugang salapi tungod kay nahurot na ang ilang salapi bisan wala pa matapos ang tuig 2021. Gibasura sa konseho ang gipangayo nga salapi sa DPS.

Sa dugang pakisusi nga gihimo ni Konsehal Nestor Archival sa ARN Central Waste Management nga maoy nagdumala sa Landfill sa Barangay Binaliw diin didto gilabay ang basura, iyang nasuta nga gikan sa Enero hangtod sa kataposang bahin sa Mayo 2021 ang DOCAST nakahakot og 35,038 ka toneladang basura, ang DPS nakahakot og 19, 943 ka toneladang basura samtang ang mga barangay nakahakot og 17, 766 ka toneladang basura. Sa kinatibok-an, moabot sa 72, 747 ka toneladang basura ang nahakot ug nalabay sa Barangay Binaliw Landfill.

Nakapangutana si Konsehal Archival kon nganong gibayaran sa siyudad ang DOCAST sa kantidad nga P250 milyones nga ang bayranan anaa ra man unta sa P63 milyones basi sa gidaghanon sa basura nga nahakot. Gibulgar usab ni Rama nga tulo ka tseke ang napagawas para bayad sa DOCAST nga wala moagi sa iyang buhatan isip acting Mayor niadtong panahona. Kinsa kaha ang nakakuwarta sa dakong kuwarta sa basura?