Ang gahom ni Duque

Nanghulga ang mga medical workers lukop nasud nga mohunong sa pagtrabaho ug mag-rally aron madunggan sa gobiyerno ang ilang mga yangungo mahitungod sa wala nila pagkadawat sa ilang Special Rest Allowance (SRA) hangtod karon.

Ang nasud aduna kini 370,000 ka mga medical worker nga nagtrabaho sa pangpubliko ug pribado nga mga tambalanan. Sigun sa balaud, ang mga medical workers makadawat ug Special Rest Allowance (SRA) sugod niadtong Septyembre 15, 2020 hangtod Hunyo niining tuiga.

Ang Department of Health miuli ngadto sa Department of Budget and Management (DBM) dayon sa nasudnong panudlanan sa kantidad nga P1.8 bilyones nga para unta sa Special Rest Allowance.

Tungod niini, napuno sa mga pagsaway si Secretary Francisco Duque III gikan sa mga kongresista ug mga senador nga mibuhi na usab sa ilang panawagan ngadto kang Secretary Duque sa pagluwat na sa iyang katungdanan tungod sa iyang pagka incompetent sa iyang trabaho.

Tungod sa pagka-incompetent sa iyang trabaho giuli niini ngadto sa nasudnong panudlanan ang kantidad nga P1.8 bilyones nga para unta sa SRA sa mga medical workers. Samtang ang mga medical workers nanghulga nga mohunong na sa ilang trabaho kay hangtod karon wala nila madawat ang ilang SRA. Makalagot si Duque.

Angayan na gayod si Duque nga pakanaugon sa iyang katungdanan kun ang mga sakop sa Kongreso ang atong paminawon. Para sa mga Senador panuway na ang ilang tanaw ni Duque. Apan bisan pa man niini, wala silay mahimo kay anghel siya sa panan-aw ni Presidente Rodrigo Roa Duterte. Mao ni ang rason nga ang tubag ni Duque sa panawagan sa pagpakanaug kaniya sa katungdanan mag agad ra siya sa Presidente.

Sa laing bahin, awhag nako sa mga medical workers, ayaw nalang ninyo tinud-a ang inyong hulga. Maayo gani mo ang inyo rang SRA ang wala ninyo madawat. Ang mga medical workers intawon sa dakbayan sa Sugbo ila gyong suweldo ang wala nila madawat sulod sa lima na ka buwan.