EDITORYAL - Dili layong mabalik sa ECQ

Dili na angay ikahibulong pa kun ibalik sab sa enhanced community quarantine ang pipila ka mga dapit dinhi sa Sugbu sama sa gihimo didto sa Metro Manila nunot aning pagsaka gihapon sa mga kaso sa coronavirus dugangan pa niining hulga karon sa Delta variant sa maong sakit.

Ang Metro Cebu sentro sa komersiyo maong naa sab dinhi nagdasok ang daghang mga tawo nga nanimuyo ug nanginabuhi. Apan naa sab dinhi ang daghang mga malapason sa mga health protocols.

Usa sa mga posibleng hinungdan sa pagsaka sa mga kaso mao kining mga tawong wala gihapon moseryuso pagtuman sa mga health protocols ilabi na diha sa mga pangpublikong mga dapit sama sa kamerkadohan, mga sudlonong bahin sa mga barangay ug uban pa.

Usa sab niini kining paglaag-laag bisan og dili importante ang mga lakaw. Mga parties ug uban pang kalihokan nga dili pa gyud unta angay karong mga panahona.

Labaw sa tanan, dunay mga tawong dili magtarong pagsuot ug ang uban dili gyud magsuot og facemask ug magsige lang gihapon og tapoktapok.

Hangtud nga dili makat-on ang katawhan pagpuyo kauban kining maong pandemiya pinaagi sa pagtuman sa mga health protocols dili mahunong kining pagtakud-takod sa sakit. May paglaum gihapon kun mayoriya sa populasyon mabakunahan batok sa maong sakit tungod kay pinaagi lamang niini dili magrabehan kadtong mga matakboyan.

Matud pa sa mga doktor, labing nagkinahanglan niini kadtong mga masakiton ug mga edaran na tungod kay hinay na ilang resistensya batok sa mga sakit.

Angay unta hinumdoman sa katawhan nga hangtud nga dunay pagtakud-takod sa maong sakit diha sa komunidad ug hangtud dili tanan mabakunahan magpabiling maapektahan ang ilang panginabuhian ug ang ekonomiya sa nasud.

Walay ganahang mabalik ang bisan unsang lugar sa estadong gikinahanglang mag-lockdown, apan sa pagkakaron, walay laing nakitang mas paspas nga solusyon ang gobiyerno pagsanta sa pagkatap sa coronavirus kondili ang pagpatuman niini aron maprotektahan ang katawhan ug ang ekonomiya.