Tinonto sa sementeryo

Sa pagsaka sa kaso sa COVID-19 sa dakbayan sa Sugbo misaka usab ang gidaghanon sa mga nakalas nga maoy usa sa hinungdan nga napunopuno na kuno ang sementeryo.

Gani ang mga sam-ang nga naa sa sentro sa syudad wala namay available nga kalubngan, matud ni Konsehal Dave Tumulak. Busa ang uban nga namatay sa menteryo sa bukid nalang gipahiluna.

Apan niay gibutyag ni Konsehal Tumulak nga nahitabong tinonto sa A. Lopez Cemetery habig sa Labangon nga panghabwaon ang mga patay sa lubnganan bisan og wala pa maabti og tagal kay pulihan og lubong sa mga bag-ong namatay.

Kini ang nadawat nga taho sa konsehal busa nagpahigayon kini og pakisusi uban ang Cebu City Health Office kay peligro kaayo sa panglawas sa mga tawo kong dili matarong paghabwa  ang patay nga wala mahasubay sa proseso.

Gawas pa dako kining pag-among-among sa minatay kansang pamilya wala gani makahibawo nga gihabwa na diay ang ilang minatay sa lubnganan ug gipulihan na.

Naay uban nga itunong og gabii ang paglubong aron dili mabantayan, sama niadtong nahitabo sa miaging tuig nga usa ka covid positive ang gipalusot og lubong.

Kong tinuod man ugaling kini, naa gyuy nakasapi niining kalakiha. Basta kwarta na gani ang hisgotan, pastilan mahitabo gyud ang mga illegal nga kalihokan.

Moingon sila nga tungod sa kalisod nakahimo og tinonto bugti sa kantidad. Apan usa kini ka pagyamayama sa minatay ug sa pamilya.

Kabaw sa tanan gibutang nila sa peligro ang kinabuhi sa mga tawo sa dapit kay dili man maseguro kon unsay namatyan sa gipuli paglubong diin kong naay mananakod nga kagaw aw segurado gyud nga mokuyanap kini.

Akong gibisita ang menteryo, wala pa man masirado kay naa pa man ganiy gilubong. Hinuon basta nahasubay lang sa proseso wala may problema.

Usa kini sa bantayan sa hingtungdan nga ahensiya ang mga binuang aron dili na makaamong pa.

Kong gikinahanglan dunay manubag aron motagam mas maayo aron madisiplina ang mga tawo nga naghimo sa ingon.