Tabon imbes sulbad sa problema
Ang tinuod mao nga niawas na ang kasagaran sa mga ospital sa Sugbo sa mga pasyente sa Covid-19. Pero sama sa nahitabo sa pagsulbong sa mga kaso sa niaging tuig ang mga opisyal sa gobyerno nipili sa pagtago sa problema imbes pagsulbad ini.
Maong samtang nagsige og saad pagdugang sa kapasidad sa mga ospital, gipalabi nila ang pagbandilyo sa sayop nga mga numero sa Department of Health--nga niihap sa tanang higdaanan, di sa mga higdaanan ra nga mahimong kapahimutangan sa mga pasyente takdo sa gidaghanon sa healthcare workers nga makaatiman.
* * *
Di tanang niawas nga mga ospital sa Sugbo ang pareha sa Chong Hua sa Cebu City nga may igong luna nga kalinyahan sa mga ambulansiya ug pribadong mga sakyanan sa mga pasyente nga nagpaabot og bakanteng mga kuwarto.
Pero hapit tanan managsama ang problema: Taas nga listahan sa mga pasyente nga magpa-admit kay naglisod pagginhawa ug nahadlok nga positibo sa Covid-19. Karong semanaha, dungan sa mas paspas nga pagsulbong sa bag-ong mga kaso, ang nagkataas nga wait list sa mga ospital niabot na og kapin sa gatos ka ngan.
* * *
Ang angay untang himuon sa DOH ug sa lokal nga mga opisyal mao ang paspas nga pag-hire og dugang healthcare workers ug pagpada og dugang mechanical ventilators, mga tambal ug ubang kahimanan aron takos nang mga ospital pag-atiman og dugang mga pasyente.
Pero unsay ilang gihimo? Gipapahawa sa traffic enforcers ang nagparadang mga sakyanan ug nagpaletrato ang mga politiko sa hawan nga dan atubangan sa Chong Hua ug padayong gipahilom ang mga tagduma sa aktuwal nga sitwasyon sa ilang mga ospital.
* * *
Sa niaging tuig, nisumbong ang mga doktor sa pag-awas sa mga ospital sa Sugbo ngadto sa niduaw nga mga sakop sa National Task Force (NTF) sa Covid-19 nga gipangulohan ni Heneral Carlito Galvez. Nituki ug naningil og dinaliang sulbad sa problema ang consultant ni Galvez nga si Dr. Tony Leachon.
Unsay nahitabo? Gisabonan sa DOH ang mga tagduma sa mga ospital sa Sugbo ug gitaktak sa NTF si Leachon. Maong di ikahibung nganong hilom ang mga ospital ug way taga NTF nga nagsusi unsa kamatinud-anon ang mga numero sa DOH. Samtang nagkadaghang nangasakit ug nangamatay.
- Latest
