Stay at home

Nisibaw na usab ang laing hugna sa panawagan nga kinahanglang mo-stay at home ang kadaghanan kanato ug dili maglaaglaag aron paglikay ning airborne nga Delta variant. Ang makanunayong pagsul-ob sa facemask kinahanglanon kuno aron sa ingon malikayan kining maong virus.

Daghan pud ang mga isyu kalabot sa bakuna kinit ungod  kay dunay mga adverse effect ingon tang pulonga. Daghan pud ang nag-ingon nga kini usa man ka genocide kun ang pagpatay og daghang mga tawo. Mao na ba kaha kini ang gitawag nilang Mark of the Beast? Kini ug uban pang mga pangutana maoy nilutaw sa hunahuna sa daghang  mga tawo.

Apan hangtud asa kutob ang tanan? Nagpasabot ba kini nga mahanaw na sa hingpit ang virus kon mabakunahan na ang tanan? Nganong padayong nisaka ang kaso ug nganong daghan man gihapon ang natakdan bisan gani nila nga nabakunahan? Ang bakuna matud pa nila dili makapugong kon kita matakdan. Apan, at least, kuno dili kuno kita magrabehan. Apan ang pangutana nganong duna may nangamatay?

Kini ang mga suliran nga giatubang sa kadaghanan. Matag usa kanato dunay kaakohan nga manginlabot. Apan wala kini magpasabot nga ang maong panginlabot alang sa pagsumpo ning maong virus nga mikuyanap.

Apan malisod kaayo ang pagkab-ot ning kahiusahan labina kun dili ingon ana ka matinud-anon ang atong mga pamunoan sa paghatag og kinatibuk-ang hulagway ug panghitabo. Ang tanan nahimong pahapyaw lamang. 

Apan subo palandungon sanglit ang mga nabutaan ug mga panatiko nahimong daw mga kabayo nga girendahan ug dili na lang gyud molingi sa palibot aron mamahimong pokus diha sa pagsunod sa mando. Lisud rong panahona kay daghan ang maglagot labina kun palihokon nimo ang imong utok.