Sayod na sa sangputanan

Malaumon ang Malacañang nga katapusan’g hugna na kining pag-imponer sa ECQ sa National Capital Region sugod Agosto 6 hangtod sa Agosto 20.  Pinasikad ang pangindahay sa nagkadaghan na nga nabakunahan. Posible’ng mahitabo ang gilauman sa Malacañang kay anaa man kanila ang kagahum pag-imponer sa lagda nga buot nila ipatuman.  Dili usab nila malisod tag-anon ang umaabot tungod sa kasayuran nga ilang gihuptan.  Ginaingon bitaw nga “Ang labing kasaligan’g paagi pagtag-an sa umaabot mao ang paghimo niini”. Sa hisgutanan sa COVID-19, daw Juan Pusong ang Malacañang kay nasayod na sila daan sa sangputanan. Pagoryo-goryo lang!

Mokayod sama sa irô

Mogahin ang kagamhanan og kapin sa 13 bilyones ka pesos isip ayuda sa mga apektado’ng residente sa pagpa-ubos na unya sa NCR sa Enhanced Community Quarantine sugod karon Agosto 6, 2021. Tag-1K hangtod 4k ang madawat sa mga benepisaryo.  Karon pa lang, mireklamo na ang katawhan nga kulang ang maong kantidad sa 14 dias nga ECQ.  Dili kinahanglan ang calculator pagkwenta kon paigo ba o kulang ang ayuda.  Sa kamahal sa palaliton karon, kon buot ang tawo magkinabuhi bisan sama lang sa irô, kinahanglan nga mokayod ang tawo sama usab sa irô.  May’pag moligeeed!

“Wait for your turn”

Namahayag si Cebu City Councilor Dave Tumulak nga nagkasabot na ang kagamhanan sa dakbayan sa Sugbo ug ang mga punerarya nga unahon pag-cremate kadtong mga namatay tungod sa COVID-19.  Apil usab sa nasabutan mao ang pagpakunhod sa bayad sa pagpa-cremate.  Tungod sa COVID-19, bisan ang pagpahiluna sa mga minatay, motamod na sa polisiya sa maayong pamatasan nga “Wait for your turn”.  Apan gumikan sa atong kahadlok nga matakdan, dili na kita makatamod sa giingon sa bibliya nga “Pasagdi ang mga patay nga maoy magalubong sa ilang mga kaugalingong mga minatay”.  Madahaan!

Escabeche nga humba

Ang Samahang Industriya ng Agrikultura (SINAG), usa ka pundok sa mga mag-uuma, misugyot nga ilisan ang ngalan sa Department of Agriculture (DA) ngadto sa Department of Importers, Retailers and Traders kon DIRT, tungod kay gipatigbabaw sa maong ahensya ang polisiya sa importasyon. Dili sulbad ang pag-usab sa ngalan. Pagbuhat sa mandato ang gikinahanglan.  Makapahinumdom sa akong higala nga tungod kay gidid-an na pagkaon sa karne’ng baboy, iyang gihinganla’g escabeche ang humba aron makakaon gihapon siya.  Pagkatoytoy!

Dili una pagawson

Namahayag ang Meralco nga mopatuman na usab sila sa “no disconnection policy” sa mga lugar nga napa-ubos sa ECQ/MECQ agi’g pagsabot sa kalisod sa mga konsumidor ni’ng panahona. Maanindot ang maong polisiya. Unta sagupon kini sa ubang kompaniya nga may susamang serbisyo.  Labot pa, atol sa ECQ, gidili pa man ang paggawas-gawas ug pagsuroy-suroy. Busa, kadto’ng tig-basa sa metro sa tubig ug kuryente ug mga kolektor sa lending, “Stay at Home” lang una.  PM is the key!