_banat
^

Banat Opinyon

Nganong taphaw ang lockdowns

ARANGKADA - Leo Lastimosa - Banat

Sa tibuok kalibotan, ang pamunoan ni Presidente Rodrigo Duterte ang naghupot sa rekord sa kinatas-an ug kinahigpitang lockdown sa Covid-19. Pero nganong wa man mabadlong ang tinakdanay sa kagaw sa niaging tuig hangtod sa mas grabeng pagsulbong tungod sa Delta variant karong tuiga?

Nganong mas malampuson man ang mas mubo ug pinili rang lockdowns sa ubang kanasuran? Usa sa posibleng tubag: Gipahibawo ang ECQ sa Metro Manila sa niaging semana pero karon pang Biyernes, Agosto 6, ipatuman; ambot kinsay nakatambag sa Malakanyang nga maghuwat rang Delta kon kanus-a sila kapangandam.

* * *

Laing posibleng katin-awan: Silang Presidente Duterte ug retiradong mga heneral ug ubang sinaligan niinsistir sa pagtuo sukad sa pagsugod sa pandemiya kapin sa tuig ang nilabay nga ang lockdown igo nang makabadlong sa tinakdanay; nga inig libkas sa lockdown makabalik nang katawhan sa ilang naandang kalihokan ug makabarug na pagbalik ang ekonomiya.

Napamatud-ang sayop sila sa niaging tuig. Pero padayon nilang gihimo sa lockdowns karong tuiga. Way nakahunghong nila sa sulting Albert Einstein: “Ang pagbalikbalik og himo sa samang butang nga magpaabot og lahi nga resulta mao ang pagpakabuang.”

* * *

Unsay gihimo sa ubang kanasuran nga wa himoa sa Malakanyang sa di pa ipahamtang ang bisan unsang lockdown?

• Gisabot daan ang tanang mopatuman sa lockdown sa labing hapsay ug epektibong paagi pagpatuman sa mga lagda (lahi dinhi sa ato nga maglalis pang mga politiko pagsugod sa lockdown);

• Gipasabot ang katawhan sa kadinalian sa hulga ug sa kakusganon sa panagang nga gikinahanglan; ug

• Gi-apud-apod nang daan ang ayuda para sa labing maapiki nga mga pamilya ug gagmayng mga negosyante.

* * *

Unsay gihimo sa ubang kanasuran nga wa himoa sa Malakanyang samtang nagpadayon nang lockdown?

• Pagpalapad sa swab testing ug contact tracing aron matultolan ug mabadlong dayon ang tinakdanay (dinhi sa ato, mang-recruit og contact tracers liwas na sa lockdown);

• Pagpalambo sa kapasidad sa mga ospital ug isolation facilities (dinhi sa ato, giibanan hinuong Covid-19 beds dihang nimenos ang mga kaso); ug

• Pagbansay-bansay sa dugang healthcare workers (gawas sa nurses sa Cebu City nga wa suweldohi, napupos ang Bayanihan 2 nga wa magasto ang binilyon ka pesos para unta sa hiring sa dugang healthcare workers ug contact tracers).

* * *

leolastimosaa@gmail.com

COVID-19
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with