EDITORYAL - MECQ mosalir kaha?

Mosalir kaha kining pagbalik sa modified enhanced community quarantine sa Sugbu ug makontrol ang pagdaghan sa mga kaso sa coronavirus disease?

Ang IATF nakakita nga kinahanglang ibalik sa estriktong community quarantine ang Sugbu tungod sa nabantayang pagsaka og balik sa mga kaso maong nangapuno na ang mga tambalanan tungod sa kadaghan sa mga natakboyang kinahanglang i-admit.

Ang restriksyon gikinahanglan tungod kay dili na gyud magpakontrol ang mga tawo. Daghan na ang wala na magsuot og facemask, nagsige nalang og laag-laag ang mga kabataan, wala na mosunod sa social distancing ug daghan pang uban.

Usa sa kinahanglang estriktuhon mao kining mga pasaheroan, tradisyonal man ug kadtong mga modernong PUJs. Dako kaayo ang posibilidad nga usa sila sa nakatampo sa pagsaka sa mga kaso karon dinhi sa Metro Cebu.

Tungod kay nabantayan gyud nga wala na sila mosunod sa mga kondisyones nga sila makapamasahero sama sa pag-limit ilang kapasidad, pagpasuot og facemask ug faceshields u gang barriers.

Sa nanglabay nga mga semana, namatikdan nga daghang pasaheroan ang nagdasok na ang pasaherong sakay ilabi na kun panahon sa gabii nga diin daghan kaayong mga pasaheroang nagdali nga makauli.

Mabasol ang tanan bahin niini, gikan sa mga drayber ug konduktor, sa mga pasaherong wala magpakabana sa ilang panglawas ug ang gobiyerno o lokal nga mga otoridad.

Ang mga konduktor ug drayber mga hangol sa kwarta; ang mga pasahero iresponsable nga mga klase sa mga tawo nga wala maghunahuna sa ilang personale safety ug nakaamong na hinuon sa ilang mga kabanay sa balay; ug ang ikatulo mao ang mga traffic enforcers, kapolisan, mga task force nga maayo lang sa estorya ug bahad-bahad apan wala gyud mohimo og aksyon batok aning mga malapasong pasaheroan.

Gikinahanglang mosaka pa ang mga kaso ayha pa sila nibalik og estrikto ug namadlong og mga malapason PUJs. Pagkawalay mga pulos, karon pa sila moestrikto og balik nga nisaka na ang mga kaso.

Dili lang kining mga pasaheroan ang posibleng hinungdan, posible sab nga daghang nagkatinakdanay diha sa kamerkadohan, mga simbahan, malls ug bisan sa mga managsilingan kay kumpiyansa ra kaayo ug wala magsuot og facemask o wala nag-social distancing.