MCIA ang higanteng buslot sa Delta
Makapasubo nga nasudlan na ta sa mas mananakod ug mas makamatay nga Delta variant sa COVID-19. Mas makapasubo nga ang 32 ka kaso nga gipahibawo sa Department of Health (DOH) niadtong Miyerkules sa gabii nahitabo upat ka semana na ang nilabay.
Kon karon pa managang ang gobiyerno batok sa Delta, wa siyay kalainan sa polis nga niabot sa crime scene usa ka buwan human sa patay: Nauwahi kay gilubong nang biktima, nahuman nang novena para sa minatay ug hapit na ang pangadye sa panamilit 40 ka adlaw human sa kamatayon.
* * *
Pero bisan hangtod sa 80% nga mas mananakod kay sa ubang variants ug napilo og kapin sa libo ka higayon ang viral load sa Delta ug mahimong moawas na sang mga ospital sa mga mangasakit, di ta inutil.
Samang mga pagtuon nga nakadiskubre sa kabangis sa Delta nagkauyon nga kasaligan gihapong panagang ang minimum health protocols--pagpanghunaw, pag-face mask ug physical distancing. Napamatud-an sang epektibo ang mga bakuna paglikay sa grabeng symptoms ug kamatayon. Kasagaran sa mga na-ospital ug nangamatay sa Delta sa ubang kanasuran maong mga wa pay bakuna.
* * *
Bisan nilabay nang sapa sa tulay, maayong subayon nganong nasudlan ang Sugbo sa Delta. Aron matapakan ug di na mausab. Mao ni gihimo karon sa DOH ug local government units (LGUs). Gibalikan ang mga pasyente pagpakisayod wa ba silang kapanakod og mas daghan.
Giisip silang lokal nga mga kaso--9 sa Lapulapu, 6 sa Cebu City, 3 sa Mandaue, 2 sa Cordova ug 2 sa Samboan--kay pulos wa kabiyahe sa ubang kanasuran. Maong angay sang susihon kinsay nakatakod nila.
* * *
Sukad sa Marso 30 ning tuiga nga gipaluagan sa Kapitolyo sa Sugbo ang quarantine sa mga pasahero sa incoming international flights sa Mactan Cebu International Airport (MCIA). Gisupak ang Inter-Agency Task Force (IATF) nga nitakda niadtong Mayo 7 og minimum nga 10 ka adlaw nga quarantine sa Returning Overseas Filipinos ug Overseas Filipino Workers. Gihulga pa gani og mga kasong kriminal sa mga motuman sa IATF.
Tulo ka buwan nga nahimong higanteng buslot sa Delta ang MCIA. Dihang nangisog na si Presidente Duterte ayha pa niduko ang Kapitolyo sa IATF niadtong Hunyo 22. Pero uwahi na ang tanan.
- Latest
