Badlis-badlis nga mga lagda sa IATF

Di na bag-o nga gisalikway sa Malakanyang ang rekomendasyon sa OCTA Research Group pag-lockdown sa Metro Manila sa di pa mosulbong ang mga kaso sa Delta variant. Naandan na sab nga gilalis sa Department of Health (DOH) ang OCTA ug gipasidan-an sa di pagpatuyang og sulti nga makapa-alarma sa katawhan.

Ang bag-o mao nga ang kinadak-ang grupo sa mga negosyante sa nasud niuyon sa OCTA. Gidasonan nila nga ang kadaut sa ekonomiya sa pagpatuman sa lockdown karon makapugong sa mas dakong kadaot kon huwaton ang hingpit nga pagsulbong sa mga kaso.

* * *

Nakumbinser ang mga negosyante sa dinaliang panginahanglan sa preventive lockdown di tungod kay orihinal ni nga ideya sa OCTA. Kon dili tungod kay mao ni ang gihimo sa ubang kanasuran--sama sa Australia, New Zealand, China, Vietnam ug Singapore--nga malampusong nibadlong sa Delta sa wa pa sila mahisama sa India ug Indonesia.

Pero ang administrasyon ni Presidente Duterte nahigam sa naandang kasaypanan nga magkara-kara kon moburot nang problema. Ang DOH, nga maoy tinubdan sa kasayuran sa OCTA, wa pay nakit-ang tambal sa ilang kainutil paghubad sa gihuptang mga numero.

* * *

Niinsistir ang Inter-Agency Task Force (IATF) sa COVID-19 nga mas daghan ug mas utokan ang ilang mga eksperto kay sa taga OCTA. Nipasalig sab nga mas daghan ang kasayuran nga gibasehan sa ilang mga lagda kay sa limitadong panglantaw sa OCTA.

Makumbinser unta ta sa IATF kon di pa mas daghang bulilyaso kay sa tsamba sa ilang pagduma sa kapin na sa tuig nga pandemya. Di katabang sa ilang kawsa nga mas daghang pasidaan ang OCTA nga natinuod.

* * *

Labing uwahing timaan sa ka way klaro sa mga lagda sa IATF mao ang pagpaubos sa Lapu-Lapu City ug Mandaue City sa modified enhanced community quarantine (MECQ) bisan kon ang bag-o nilang mga kaso mas gamay kay sa Cebu City (kinadaghanan og active cases), Cebu Province (kinadaghanan og bag-ong kaso sa tibuok Central Visayas sa Hulyo 28) ug Bohol.

Pero sama sa naandan ang mga lagda sa IATF nga gi-drowing sa papel nga way konsultasyon mahimong mausab sa mosunod nga mga adlaw kon motiyabaw ang mga mayor ug mga negosyante. Ug kon, sama sa naandan, ma-sakto ang OCTA.

* * *

leolastimosaa@gmail.com

Show comments