Nunot sa pagdaghan og balik sa mga kaso sa COVID-19 sa dakbayan sa Lapu-Lapu, gimando ni Mayor Junard Chan ang pagpahugot sa mga lagda aron kapugngan ang padayong pagsaka sa gidaghanon sa mga mataptan sa makamatay nga sakit.
Basi sa talaan sa Department of Health (DOH-7) niadtong Martes, dunay 1,021 ka aktibong kaso sa COVID-19 ang dakbayan ug puno na ang mga tambalanan.
Usa sa mga nakit-ang paagi ni Chan aron maminusan ang tinakdanay mao ang paglimit sa gidaghanon sa mga tawo nga makagawas sa ilang pinuy-anan.
Mao nga sugod petsa 25 sa Agosto dili na mahimong makasulod sa mga tindahan, malls ug merkado ang mga tawong wala pa mabakunahi.
Basi sa executive order ni Chan, kinahanglan kang mopresentar sa imong vaccination card aron ka makasulod sa merkado, malls ug ubang tindahan sa Lapu-Lapu.
Sa ato pa kadtong wala pa mabakunahi dili ka mahimong makapangompra sa merkado ug sa mga supermarkets. Usa sab kuno ni ka paagi, matud ni Chan, aron madasig ang mga molupyo sa dakbayan nga magpabakuna.
Maayo ang tumong ni Chan apan tingali gitun-an usa niya og maayo makiangayon ba ang pagpatuman niini.
Angayang hinumduman sa mayor nga dili sala sa katawhan kun wala pa sila makadawat og bakuna hangtud karon.
Daghan na ang gustong mabakunahan apan way igong suplay ang gobiyerno.
Kun ihinayon ni Chan pagpatuman ang maong lagda unsay mahitabo sa mga pamilya nga wala pay bisan usa ka miyembro nga nabakunahan?
Unsaon man nila sa pagpamalit sa ilang inadlaw nga panginahanglan sama sa pagkaon?
Matud sa mayor duna pa kunoy panahon aron makapabakuna. Husto, naa pay panahon hangtud sa Agosto 25, apan ang pangutana duna bay igong bakuna ang dakbayan sa Lapu-Lapu aron magamit sa buot magpabakuna?
Kun duna man, makaya ba sa mga vaccination centers niini nga mabakunahan ang tanang molinya aron pagpabakuna?
Kun dili, maayo tingali nga mangita og alternatibong paagi si Chan aron pagkontrolar sa pagpanggawas sa mga tawo.
Pananglitan ipatuman nila pagbalik ang pag-isyu og quarantine pass diin usa lang sa matagpamilya ang mahimong mogawas aron sa pagpamalit.
Salikwaot sab nga paminawon nga ang mga mosulod sa merkado ug supermarkets aron sa pagpangompra atong pangitaan og vaccination card apan ang mga tindiro ug tindera wala ta kasiguro kun sila bakunado ba o dili.