Ilo'ng tuwapos ang kaparotan

Sa talagsaong kadaugan ni weightlifter Hidilyn Diaz sa Tokyo 2020 Olympics, midagsang usab ang mipahalipay ug mitimbaya kaniya lakip na gani ang mga diplomat nga nagbase sa kaulohan. Apan aduna’y pipila usab nga misaway sa kagamhanan ginamit ang maong kadaugan. Makapahimu-ot ang Pinoy.  Bisan kadtong maghatag kanato’g garbo, mahimo gihapon nato’ng ipamolitika.  Kon naparot pa sa Hidilyn Diaz, unsa kaha ang atong reaksyon?  Haum ang panultihon nga “Ang kadaugan daghan og ginikanan; apan ang kaparotan usa ka ilo’ng tuwapos”. Saoonz!

Dili angayan tugotan

Mopahigayon og imbestigasyon ang Committee on Local Government sa kamara bahin sa kontrobersiyal nga kasabutan tali sa dakbayan sa Sugbo ug sa Megawide Construction Corporation sa pagmoderno sa Carbon Market.  Adunay gahum ang kamara sa pag-imbestiga “in aid of legislation.”  Apan gipadagan usab ang kagamhanang lokal ubos sa prinsipyo sa decentralization. Ni’ng kalakiha, angayan’g hinuklogan sa mga lokal nga opisyal ang giingon ni Jim Doyle nga “Dili ako makatugot nga ang mga tawo nga wa magtarong pagdumala sa nasudnong pundo, mosuway usab pagdumala sa kagamhanan’g local.”  Abangan!

Nokos-nokos

Paglabay sa kapin sa bulan human gi-abandonar sa dakbayan sa Sugbo ang laraw nga sementeryo alang niadtong biktima sa COVID-19, girepeke pagbalik sa dakbayan ang lingganay sa alarma tungod sa taho nga napuno na ang mga sementeryo sa dakbayan.  Daw nagnokos-nokos man sila niini.  Ginaingon baya nga “ang pag-hiko-hiko daw kagaw nga makapaluya sa kasundalohan ug makapa-wagtang sa ilang tinguha nga modaug o molahutay”.  Busa mga opisyales magmahukmanon kamo ug dili maghiko-hiko.  Mas diyotay ang kadaut nga mahimo sa sayop nga hukom kay sa walay gihimo’ng hukom.  Decideramos!

Unahon ang mahinungdanon

Miawhag si TUCP Party-list Representative Raymond Mendoza nga mopahigayon ang kamara og imbestigayon sa kahimtang sa mga online platform-based delivery drivers uban ang pag-suta kon aduna ba’y employer-employee relationship ang maong mga trabahante tali sa online platform.  Tungod kay nawad-a’g trabaho, daghang midiskarte panahon sa pandemya aron lang mabuhi. Angayan tingale unahon pagtagad ang solusyon sa COVID-19 sa dili pa atubangon ang maong isyu.  Basin mahisama kita sa laog/hangol, nga daghan kaayong pagkaon gibutang sa iyang plato apan dili diay makahurot busa nahimo hinoong lamaw/pasaw.  Fezteleern!

Lupig ang brayt sa kugihan

Adunay bag-ong matang sa humay nga gikultibar karon sa Cambodia nga gitawag og “Floating Rice.”

Ang maong matang sa humay, gawas nga molahutay kon malunopan, wala usab magkinahanglan ug pesticides.  Dinhi sa ato nga kanunay makasinati ug lunop tungod sa bagyo, angayan tun-an ang pagkultibar sa maong matang sa humay.  Baligho lang hunahunaon nga sa kanhi-ay ang nasud sa Cambodia dinhi sa Pilipinas magtuon pagtikad ug pagtanom sa maong lagutmon.  Dili tanan daugon sa pa-brayt’ay; sagad sa kakugi pud.  Lupigaaan!