Lumba sa padaghanay sa COVID-19

Naglumba karon ang mga dapit sa Sugbo ilabi na ang tulo ka dagkong syudad sa padaghanay og kaso sa COVID-19 diin winner ang Cebu City nga naay kinadaghanang kaso. Hinuon expected man kay daghan man sad og population.

Busa mipatuman gilayon og hinanaling aksyon ang mga local government units sama sa pagpatuman og balik sa liquor ban, pagpasayo sa curfew ug pagdili sa panagtapok sa mga pampublikong dapit sama sa Plaza Independencia.

Mosaler kaha kini? Basin...mamasin lang ta kay ang mga tawo pwera sa kadtong mga motuo. Pero naa gyuy daghan nga gahi og utok nga mosupak. Aw, tan-awon nato kong mapakunhod og usa ka buwan ang kaso kay kong dili posibleng mabalik na pud kita sa mas taas nga quarantine status.

Magdepende ang tanan sa matag usa kanato. Simbako ang atong gipahimuslan nga MGCQ karon sa taas nga panahon ma-promote na pud og GCQ o MECQ dili na seguro kahayon ang kapait nga epekto niini.

Ang talan-awon karon sa mga tambalanan sa tinuod lang makapanglimbawot na sa balhibo, matud sa kasaligan nga tinubdan. Ang mga ambulansya nga maglinya sa gawas sa mga hospital nagpakita lang tinood nga sitwasyon nga nagkuwang na ang health care facility.

Kagahapong adlawa, 57.1 % ang bed occupancy rate sa mga hospital nga hapit na maabot sa 60% nga critical level. Hinuon dili lang taga dakbayan sa Sugbo kon dili usab sa mga dapit nga gawas sa Cebu Ctiy ang naadmit sa mga hospitals.

 Giangkon ni Konsehal Joel Garganera, pangulo sa Emergency Operation Center EOC sa dakbayan sa Sugbo, nga punopuno na ang mga tambalanan sa nga nag-atiman sa COVID19. Gawas pa, adunay mga health workers nga nang-resign na sa trabaho kay nangita og laing oportunidad sa ubang nasud tungod sa kalangan nga pagpagawas sa mga benepisyo ug gamay nga sweldo.

Kong nahimo kaniadto nga mapagamay ang COVID-19 mas mahimo nato kini karon tungod kay na-master naman seguro sa tanan ang mga gimbuhaton sa pagpakigbatok o paglikay sa virus. Apan kong subra ka kompiyansa mahulog gyud sa wala ang atong paningkamot bisan og naa nay bakuna kay dili garantiya ang vaccine nga dili na mataptan sa virus.

Gani ning buwan lang sa Hulyo, 38 na ang namatay apil kadtong mga nabakunahan batok COVID-19 ug dili lang mga senior kon dili naa usay mga batan-on.

Balikbalik man ang pahinumdum apan dili kita pul-an sa pag ingon nga magmatngon ang tanan.