_banat
^

Banat Opinyon

Kinadak-ang buslot sa Cebu City Hall

ARANGKADA - Leo Lastimosa - Banat

Kapin sa duha ka tuig human sa ilang pagbanos sa Cebu City Hall, ang mga abogado ug ubang tinudlo ni Mayor Edgar Labella di pa gihapon kamao sa ilang trabaho. 11 ka buwan na lay nahibilin sa ilang termino nagkayamukat gihapon sila bisan sa labing batakan nga tahas—pagpanuweldo.

Human nauwawan sayo ning tuiga dihang nireklamo ang healthcare workers sa Cebu City Medical Center (CCMC) ug Cebu City Quarantine Center (CCQC) sa kalangay sa ilang suweldo, karong buwana nang-resign na gyod ang nurses nga wa masuweldohi og upat na ka buwan.

* * *

Daghang lusot silang Labella ug kaubanan: Gibasol ang department heads sa City Hall nga wa dayon kahikay sa gikinahanglang mga dokumento; gitulisok ang mga tagduma sa CCMC kay wa kasumiter dayon sa tanang panginahanglan; ug, kay wa na may laing mahan-okan, gimahayan ang healthcare workers nga wa katarung sa ilang papeles.

Mapasaylo ang kaguliyang kon mao pay paglingkod nila sa katungdanan ug mao pay pagsugod sa pandemya. Siyaro wa gihapoy nakamaohan nga kapin sa tuig nang pandemya ug sila nay nagtungkawo sa gahom sukad pa sa Hunyo 30, 2019?

* * *

Usa sa posibleng rason nganong nagkatuiris ang City Hall hangtod karon mao ang finding sa Commission on Audit (COA): Si City Administrator Floro Casas Jr. nipirma og mga transaksiyon sa bisan unsang kantidad bisan way pagtugot gikan sa mayor.

Posible kahang natingob ang panahon ni Casas pagduso sa mga transaksiyon nga labihan kadinalian, nga nalaktawan na ganing mayor, maong nataligam-an ang labing sayon unta niyang trabaho pagsegurong masuweldohan sa gitakdang panahon ang mga trabahante sa City Hall?

* * *

Laing posibleng hinungdan mao ang estilo sa liderato ni Labella. Kinsa, segun sa COA, nitugyan sa iyang gahom ngadtong Casas nga way bisan gamayng superbisyon pagsusi natuman bang mga lagda sa mga transaksiyon nga ilang gisudlan.

Nabalaka hinuon kong ang kinadak-ang buslot sa City Hall mao ang mayor. Kinsa way kasinatian sa pagduma sa higanteng burukrasya, mas ganahang mangimbestigar kay sa magplano para sa ugma sa Sugbo, di gani katarung og pasabot nganong di ka-report sa City Hall tungod lang sa iyang ear infection ug ubo, ug ang kinatibuk-ang pamolitika nahisama sa lusay nga way dugokan.

* * *

leolastimosaa@gmail.com

CEBU CITY HALL
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with