_banat
^

Banat Opinyon

Unsay kahimtang sa mayor?

LINTUNGANAY - Fred P. Languido - Banat

Dugay na’ng gidungog nga dunay seryosong sakit nga gihambin si Cebu City Mayor Edgardo Labella kini human sa dayag nga kausan nga makita sa iyang hitsura mataghigayon nga moatubang siya sa publiko.

Nisamot ang mga pagtahap dihang tagsa nalang siyang makit-an sa iyang opisina ug sa sagunson niyang pagpaubos sa medical leave.

Sulod ning tuig 2021 ka-upat na mopaubos sa medical leave ang mayor.

Apan sukwahi sa mga nanggawas nga tabi-tabi nga duna siyay seryosong balatian, pulos gagmay ug di angayang kabalak-an ang mga sakit nga nahimong hinungdan sa iyang pagpatambal—lakip niini ang operasyon sa gallstone, ear infection ug niining bag-o tungod sa pagpunay og ubo.

Apan niadtong Huwebes sa gabii kalit misibaw ang mga tabi-tabi nga kritikal ang kahimtang sa mayor ug diha gyud gani dili maayo nga mga estorya.

Tungod niini napugos pagluwat og pamahayag ang anak sa mayor nga si Jaypee aron ihimakak ang mga migawas nga tabi-tabi.

Sigun sa post ni Jaypee diha sa Facebook nga dili tinuod nga himatyon ang iyang amahan.

Giangkon hinoon niya nga duna ni pneumonia apan maayo na ang kahimtang niini ug nagpaabot nalang nga makagawas sa tambalanan. Mao sab ni ang gibutyag ni City Administrator Floro Casas, Jr.

Nanawagan sila sa mga nagpataka og pakatap sa estorya nga hunongon na ug iampo hinuon ang hingpit nga kaayohan sa mayor.

Husto ang anak sa mayor ug si Casas sa ilang panawagan. Dili maayo ang pagpatakak og estorya ug ang pagpanungo labi pa ngadto sa usa ka dakong opisyal sa dakbayan.

Kun politika man maoy motibo sa pagpakatap sa way igong basihanan nga mga estorya hinaut nga kini maundang ug mopatigbabaw ang desente nga matang sa pamolitika.

Ug aron hingpit maundang ang pagpanunglo sa mga kontra niya sa politika labi pa kadtong mga nag-interest sa pwesto sa mayor, tingali makatabang kun itug-an sa pamilya ug sa mayor mismo ang tinuod niyang kondisyon nga way tagoan nga mga kasayuran.

Ug maayong sugdan nilang Casas ang pagpakita sa kahimtang sa mayor pinaagi sa pagkuha og hulagway uban niya sulod sa tambalanan.

Sa ingon niini mahunong ang mga pagduda nga seryoso ang kahimtang sa mayor.  O bisan mubo lang nga video message gikan sa mayor aron paghatag og assurance sa mga molupyo sa dakbayan, labi pa sa iyang mga supporters, nga way dautang nahitabo niya.

EDGARDO LABELLA
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with