Exempted ba?

Dili ba higpit pa man gipatuman ang mga dos and don’ts sa nasinati nato karon nga pandemic? pagsul-ob ug facemask nga gibalik balik na gyud na nga dili na kinahanglan nga ipahinumdum pa seguro kay nahimo na kining kabahin sa atong kinabuhi. Apan anaay mga tawong nagpakilimos sa karsada nga mora’g exempted sila sa mga gipatuman nga protocols sama nalang niining pipila ka mga miyembro sa Badjao community nga nagpadayon sa ilang panginabuhi sa karsada.

Klarohon lang nako nga dili tanan kon dili pipila lang nga mga Badjao kay nasayod ako nga duna kini silay patakaran sa ilang komunidad nga nag-discourage sa ilang mga miyembro nga manglimos kay naa man usab silay panginabuhian.

Sa dakbayan sa Mandaue ug bisan gani sa Lapu-Lapu ug Cebu City anaa gyud kini sila halos kada adlaw magyampungad sa karsada kay mangayo og limos.

Magdala sila og mga bata, adunay mga masuso, naay mga wala pay buot nga ilang ipasaka gani sa mga PUJ kay magsayaw sayaw aron makakombinser sa mga tawo nga mohatag og bisan unsa. Kaniadto murag okay kay wala pa may pandemic, wala pa ang COVID-19. Apan karon lahi na kay posible’ng kining mga tawhana adunay virus nga makatakod sa uban o ba kaha sila ang matakdan sa mga tawo nga ilang gipangduolan.

Mas nakapeligro kay wala na mauso kanila ang pagsul-ob og face mask. Kini akong tumbokon diha sa intersection sa Alang-Alang dakbayan sa Mandaue diin halos kada adlaw ako silang maagian ug nakuhaan gani nako og hulagway.

Naay usa ka inahan nga nagkugos sa iyang anak nga murag bag-o pa lang natawo, wala siyay facemask lakip ang iyang anak nga gikugos, magsige sila og panuktok sa mga sakyanan.

Samtang ang laing babaye nagguyod sa iyang anak nga iyang ipasaka sa mga multicab dayon tunol og sobre sa mga pasahero aron mangayo, wala sad silay facemask. Para kanila wala nay COVID-19 nga nahibalik na sila naandan nga wala pa ang pandemic kay yano ra kaayo silang naglakaw lakaw nanginabuhi pinaagi sa pagpangayo og limos, pastilan dilikado kaayo kini.

Kining mga tawhanan ilabi na ang mga bata posibleng mamahimo silang super spreader sa virus, nibalik na ra ba sa pagsaka ang COVID-19 karon ilabi na nga nakasulod na ang Delta variant. Sa mga otoridad, unsa man ang inyong mahimo aning mga tawhana? Exempted ba sila sa mga health protocols? Suwayi gani ninyo og susi ang mga intersection diha sa dakbayan sa Mandaue dili gyud mo mapakyas nga makita sila.

Dili pa man kaha allowed ang mga bata nga mogawas-gawas tungod kay naa pa kita sa pandemic, nganong yano ra man nga nakagawas ang mga bata niining mga Badjao nga maglatagaw sa karsada. Nakasabot ako nga panginabuhi apan dili angayan nga palabyon kini kay kitang tanan ang maapektohan kong simbako mobalik na usab og burot ang kaso sa COVID-19 kay mabalik na sab ta sa mas estriktong protocol nga mosangpot sa pagsirado na usab sa ekonomiya.