Kasuko makapahasubo

Ning dakong away nga atong nasaksihan karon: Senador Manny Pacquiao batok sa namunoang administrasiyon sa nasud, si Manny mapagarbohong mipahibalo nga dili siya bakakon ug korap.

Nalimot si Manny nga siya usa na ka politiko, diin usa sa mga kuwalipikasiyong gikinahanglan sa gustong moapil, mao: ang kaantigo kang mamakak. Kon ikaw wala niini, dili ka makapasar. Dili ka gayod makadaog!

Ug kay si Manny miagi ma’g kadaogan: na-kongresman, unya na-senador, dayag na lang, nga anaa siya ining kuwalipikasiyona. Hinungdan, siya nahigalam. Nangambisyong mamahimong presidente sa Pilipinas sunod tuig, 2022.

Busa, sa left and right hook nga mga alegasiyon, daw iyang gisuntok ang pagpamunoan ni Duterte. Gikan sa West Philippine Sea nga problema ngadto sa korapsiyon, siya mipasangil nga wala kuno si Presidente Rodrigo Duterte makasulbad. Hinunoa, mipasamot!

Mireak ang mausisahong katawhan sa maong pamahayag ni Manny. Katawhang nakakita-saksi giunsa ni Duterte ang pagpakiggubat sa korapsiyon, diin wala man tuod mahanaw, apan namatikdang mius-os!  Nga sa ato pa, dili tinuod ang giyamyam ni Manny. May anino sa pagpamakak.

Usab namatud-an ang iyang pagpamakak human siya mipasiatab nga 11 ka tuig niyang gikuha ang iyang diploma sa kursong Bachelor of Arts in Political Science nga kada adlaw gyod kuno niyang gisudlan.

Tapos giutingkay ug gipautingkay ni Pastor Apollo C. Quiboloy ang mga rekord subay sa unsay gipamulong ni Manny, milutaw ang kamatuorang dili matuis.  Nga si Manny kaantigo pod diay mamakak.

Gumikan niini, si Manny, iyang mga dumadapig ug dili dumadapig, nangasuko-nag-away. Mga nindot relasiyon nangaguba. Nagkalainlaing baho nanggula. Linabayay’g lapok sa masig ka habig, hala, padayong mitualsik!

Hasta ngalan sa Ginoo, giapil-apil sa away’ng politikanhon. Gihimong taming aron samaran ang nagpakabanang alagad sa katarong, kinsa naningkamot nga dili mapunta sa dautang mga kamot ang kaugmaon sa 111M kapin nga Pilipino.

Ang kasuko walay kaayohang mapupo. Kagaw kini nga bisan sa imong higdaanan, ikaw dili pakatulgon. Basura kini nga kon dili ilabay, mounay paghan-ok sa nagkadaiyang hugaw nga mobulingbuling sa imong kaligdong.

Hulhog kini sa dautan nga kusog moabiba pagbuhat sa butang nga dili angay buhaton, diin ang pagmahay anaa pirme sa kaulahiay. Ug usahay, mosangko pa sa usa ka dugoon ug makapahasubong kataposan. Busa, maayong likayan!