_banat
^

Banat Opinyon

Ibalik ang patrolya sulod sa mga sityo

LINTUNGANAY - Fred Languido - Banat

Sa milabay'ng pipila ka adlaw misaka na pud og balik ang gidaghanon sa mga kaso sa COVID-19 dinhi sa dakbayan sa Sugbo.

Gani pila na ka adlaw nga 3-digit ang natala nga kaso sa dakbayan matag-adlaw.

Niadtong Martes mitala ang dakbayan og 181 ka bag-ong kaso hinungdan nga misaka og balik ngadto aa 1,581 ang aktibong mga kaso sa syudad. Karong adlawa posibling nadugangan na sab ang maong gidaghanon.

Ako ning gihisgutan aron pagpahinumdom nato nga magmatngon tungod kay anaa pa ang COVID-19 ug tingali magpabilin pa ang hulga niini hangtud nga ang tanan mabakunahan.

Karon nga misaka og balik ang gidaghanon sa mga kaso piligro nga mapuno pagbalik ang atong mga tambalanan og dili masanta ang padayong pagsaka sa mga kaso.

Gani duna nay mga nanggawas nga estorya mahitungod sa mga pasyente nga gibalibaran tambalanan tungod kay wala nay kwarto nga kabutangan nila.

Ang report hinuon sa Department of Health (DOH) nagpakita nga wala pa mapuno ang atong mga tambalanan. Kun unsa ka tinuod ug ka kasaligan ang ilang datus sila ray nasayod.

Apan kini maoy tinuod, ang inahan sa higala sa akong asawa natakbuyan og COVID ug anaa ron sa usa sa mga tambalanan dinhi sa dakbayan.

Sabado dihang siya nadala sa tambalanan ug Martes na siyang nakakuha og kwarto tungod kay way bakante. Kinahanglan pang magpalaban ang pamilya og kaila aron sila makakuha og kwarto.

Ang ilang kasinatian sukwahi ni sa datus nga gipagawas sa DOH. Busa angayan tingali nga ipasabot sa DOH nganong dunay mga nakasinati og ingon niini kun wala magkuwang ang atong mga lawak alang sa pasyente sa COVID.

Angayan na sab nga higpitan pagbalik sa mga awtoridad ang pagpatuman sa mga health protocols labi pa diha sa kabarangayan aron masanta ang pagdaghan og balik sa mga kaso.

Kun nakamatikod mo daghan na sab ang di mosunod sa protocols diha sa mga sityo sama sa di pagsul-ob og mask samtang magpundok gawas sa ilang mga pinuy-anan. Daghan na sab ang akong namatikdan nga mag-inom bisan diha sa mga kan-anan.

Kinahanglang ibalik ang pagpatrolya sa mga polis sa mga hilit nga suok sa kabarangayan ug pagbadlong niadtong mga molapas sa protocol aron atong mapakunhod og balik ang gidaghanon sa mga kaso.

COVID-19
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with