EDITORYAL - Ayaw pasudla si delta

Aron mahunong ang pagkatap sa delta variant sa coronavirus ngadto sa ubang rehiyon gikinahanglang higpitan pagbalik ang mga utlanan sa nagkadaiyang mga probinsiya ug isla sa tibuok nasud.

Dili unta kini lainon og sabot sa uban tungod kay importante kaayong pugngan una ang pagkatap aning bag-o ug mas peligroso kaayong variant sa Covid-19 nga unang na-detect didto sa India.

Dunay mga report nga dali kaayo kining makatakod ug dili moila bisan pa og nabakunahan ang tawong matakboyan niini. Ingon niini kini kabangis kun itandi sa ubang mga variants.

Sa ato pa, kun makahatag gani kini og problema sa mga nabakunahan na, mas labaw tingali peligroso kining motakod sa taong wala gyud magpabakuna.  Busa, maayong magpabakuna na lang daan aron dili na mauwahi ang tanan.

Kaning paghigpit sa mga pantalan ug tugpahanan o hingpit ba kahang pagdili una sa gitawag nga “interzonal travel” o ang pagbiyahe ngadto sa ubang probinsya makatabang og dako sa tinguha sa gobiyerno nga pakgangon nga makatabok sa mga isla ug probinsya ang Delta variant.

Sa pagkakaron, dunay na-detect nga delta variants didto sa kaulohan. Maayong kutob lang kini didto ug dili na makatabok pa sa ubang mga rehiyon sama sa Sugbu.

Dili na unta magpaabot pa ang mga opisyales sa mga barangay nga modaghan ang mga kaso sa Covid-19 sa ilang barangay ayha pa sila moseryuso sa ilang pagpatrolya ug pagbadlong sa mga tawong dili mosunod sa health protocols.

Ang mga mayor sab unta dili na magpaabot pang masudlan na niining delta variant kondili unhan nang daan ang paghigpit sa ilang mga utlanan.

Maayong pugngan na kining daan mentras kaya pa sa mga tambalanan ang pagatiman sa mga bag-ong kaso. Angay hinumdoman nga bisan duna lang usa nga magdala niini nga variant  dinhi sa Sugbo, dako kaayo ang posibilidad nga makapanakod na kini sa uban ayha pa ma-detect apan posibleng mauwahi na sad ang tanan sama sa nahitabo sa nakalabay’ng tuig.

Naleksyon na unta ang publiko sa nahitabo sa miaging tuig sa dihang gipatuman ang mga lockdowns sa mga lugar ug daghang nawad-an og trabaho tungod sa kadaghan sa mga kaso.