Unsay tinuod?

Labihang nakapanghambog sa dakbayan sa Sugbo nga nakakuha kini og "unmodified opinion" gikan sa Commission on Audit sa miaging tuig.

Alang ni City Administrator Floro Casas nagpakita kuno ni nga limpiyo ug way anomaliya ang mga transaksiyon sa City Hall.

Unang higayon kuno ni nga nakuha sa dakbayan ang maong rating.

Ambot nagpagoryo-goryo ba lang siya aron lipaton ang publiko sa mga mahinungdanong punto nga nakit-an sa COA o ignorante lang gyud siya unsay buot ipasabot sa "unmodified opinion"?

Ang maong rating wala nagpasabot nga way irregularidad ang mga transaksiyon  sa dakbayan.

Igo lang ni nagpasabot nga way "misstatement" o sayop nga mga entry sa libro sa mga accounts sa dakbayan.

Kamatuoran niini mao nga gibadlong sa COA ang dakbayan tungod sa wala ma mabayri nga mga suspensions ug disallowances nga mokabat og dul-an sa P70 milyones.

Nasuta sab sa COA nga dunay kapin sa P13.7M nga pundo alang sa Social Amelioration Program nga gihatag sa dakbayan ngadto sa dili eligible nga mga beneficiaries diha sa kabarangayan.

Nasakpan sab sa COA nga dunay supplier og bugas sa dakbayan nga nakakuha og kontrata nga mokantidad og P67.3M bisan dili qualified.

Kwestiyonable sab matud sa COA ang katukoran sa P58.8M quarantine facility sa dakbayan diha sa North Reclamation Area tungod kay way klarong kontrata.

Gikwestiyon sab sa COA ang pagpalit sa dakabayan og 20 mil ka KN95 mask nga mobalor og P4.4 million.

Sumala sa COA gipaburot ang presyo niini og P340,000 kun itandi sa retail price nga gitakda sa Department of Health.

Wala sab mosunod ang dakbayan sa documentary requirements ug procedures sa pagpamalit niini og  1,670 boxes sa Rapid Anti-body test kits sa kantidad nga P42.6M.

Wala say klarong listahan ang dakbayan sa mga nadawat niini nga donasyon alang sa COVID response ug si kinsa ang ilang gihatagan.

Matud sa COA nga illegal ang pagpanghatag sa dakabayn og COVID-19 Special Risk Allowance (SRA) nga mokantidad og P11.5M ngadto sa dili mga public health workers.

Ug matud sa COA dunay kapin sa P306.7M nga pundo alang sa  76 ka mga development projects nga wala magamit tungod sa kakuwang sa dakbayan og hustong plano.

Kining tanan wala itug-an nilang Casas sa publimo ug maoy ilang gipasiatab nga gihatagan kuno sila og "highest" rating sa COA.