_banat
^

Banat Opinyon

Kakuwang og tubig masulbad na

RENBOR PATROL - Rene U. Borromeo - Banat

Gipirmahan na ang Notice of Award alang sa Joint Venture Project sa Metro Cebu Water District (MCWD) ug FDC Water Utilities Incorporated aron pagsulbad sa problema sa kakuwang og tubig dinhi sa Metro Cebu.

Ang pagpirmahay nila ni MCWD General Manager Stephen Yee ug Juan Eugenio L. Roxas, chief executive officer sa FDC Water Utilities Inc., gihimo kaniadtong Hulyo 9 didto sa MCWD Board of Directors conference room.

Base sa napirmahan nga kasabotan, ang pribadong kompaniya mo-supply sa MCWD og 30,000 cubic meters  nga tubig sa Marigondon, laing 30,000 cubic meters nga tubig para sa South Road Properties ug 20,000 cubic meters nga tubig sa Talisay.

Alang sa mga wa kaayo masayod, ang lima ka baril nga tubig maoy usa ka cubic meter. Matud ni Edna Inocando, ang corporate manager for public relations sa MCWD, nga ang FDC Water Utilities maghimo og water desalination plants, nga mopatab-ang sa tubig sa dagat.

Gitug-anan ko ni MCWD Chairman Joey Daluz III nga ubos sa iyang administrasyon, maninguha gyud siya nga masulbad ang dugay na kaayong pag-antos sa katawhan nga wa makapahimulos og tubig gikan sa MCWD.

Makapalipay kaayo kining mao nga balita kay mapanglantawan na nato nga dili na kaayo kita maproblema, ilabi na panahon sa huwaw.

Pasabton nako ang katawhan nga ayaw hunahunaa kon duna man gani gamay’ng pagsaka sa prisyo sa tubig, kay ang importante mao nga duna tay tubig nga magamit.

* * *

Mora’g may tilimad-on na nga sila si Davao City Mayor Inday Sara Duterte ug kanhi senador Bongbong Marcos maoy mag-tandem pagka presidente ug bise presidente.

Kon sila ang pagka-partner, tan-aw nako nga lisod pildehon ang ilang grupo, kay dili ikalimod nga si Inday Sara daghan og dumadapig sa Kabisay-an ug Mindanao, samtang si Bongbong Marcos pinangga usab sa Northern Luzon ug sa Eastern Visayas.

Hinoon, mora’g anaa usab sila si Senador Panfilo Lacson ug si Senador Tito Sotto nga posibleng mao usab ang pagtandem pagka presidente ug bise presidente.

Anaa usab si Senador Manny Pacquiao nga desidido na nga modagan pagka presidente, apan ang problema kon makapiog ba siya sa pwersa nila ni Inday Sara ug Bongbong?

Pagkakaron pa lang gani, mora’g naguba na ang pagkatawo ni Pacquiao tungod sa mga isyu nga gisugdan na sa pagpabuto sa iyang mga kaatbang sa politika.

Tan-aw nako, kon magkaduol ang adlaw sa eleksyon, mosamot nga daghan pa’ng isyu ang sagubangon ni Pacquiao ug maoy makapaluya sa katawhan ug moyamiid na kaniya.

MCWD
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with