Gihimong open dumpsite

Gipatuman sa Environmental and Management Bureau-7 ang Cease and Desist Order sa operasyon sa transfer station sa basura nga nahimutang sa Barangay Inayawan dakbayan sa Sugbo niadtong nakalabayng adlaaw.

Nasuta sa EMB-7 nga adunay mga kalapasan nga nahimo ang pribadong service providers sa ilang pag-handle sa mga basura nga giproseso sa pasilidad.

Apil niini ang kapakyas sa pagbutang og atop sa transfer station aron unta dili mabasa nga mosangpot sa pagtubig sa mga basura, walay water treatment facility.

Nasuta usab sa EMB-7 nga gihimo nang open dumpsite ang naasoy’ng transfer station diin hilabihan na ka taas ang file sa mga basura ug nilapas na usab sa 24 oras ang pagpundo niini. Ang baho sa basura nanuhotsuhot gyud sa ilong lapos sa baga sa mga tawo haduol sa  transfer facility kay nakabuyangyang ra man ug wala taboni.

Kining problemaha murag dugay na gyud ni sukad pa dihang gisirad-an ang kanhi Inayawan landfil ug gibalhin didto sa baranggay Binaliw ug anaa usab didto sa lungsod sa Consolacion.

Ang pagsirado sa transfer station nakamugna og kabalaka sa katawhan ilabi na sa mga barangay sa habagatang bahin sa dakbayan basin magtipun-og ang mga basura kay dili na mahakot tungod sa nahitabo.

Apan gipaneguro sa kagamhanan sa dakbayan sa Sugbo nga dili maglunang sa mga basura ang syudad kay magpadayon ang pagpangolekta sa basura.

Nagpahigayon og tigom ang mga kapitan sa habagatan sa Cebu City kauban ang pangulo sa Department of Public Services DPS diin gituki nila ang mga lakang aron dili grabeng maapektohan.

 Magpadayon ang garbage collection diin ideretso na sa landfil sa Barangay Binaliw ug gipasalig sa City Hall nga hatagan og dugang fuel allocation ang mga baranggay nga mao usay gipangayo nila sanglit layo naman kaayo ang landfil. Ang panahon sa pag-adto sa Binaliw taas na usab busa gi-cluster ang mga apektadong barangay diin mamahimong tabangan sila sa DPS sa paghakot sa mga basura.

Hinaut nga mosaler kining pamaagiha aron dili mosangpot sa grabe pa nga problema sa basura kay gikinahanglan ipatuman ang kalimpyo ilabi na karong panahon sa pandemic.