EDITORYAL - Police station nga hugaw

Makauuwaw nga dunay police station sa Sugbo nga nasakpang pwerteng hugawa ug kuwang sa mga polis atol sa kinalit nga inspeksyon sa kadagkoan sa Philippine National Police Internal Affairs Service.

Ang giinspeksyon mao ang usa ka police station ubos sa  Mandaue City Police Office nga matud pa sa mga inspectors sa IAS nagkayamukat lang sa kahugaw. Gani, hasta ang desk officer nga on duty wala magtarong og suot sa iyang facemask ug way face shields.

Ang maong hulagway sa police station naabot kang PNP Chief Police Gen. Guillermo Eleazar kinsa daling misaway sa pagkahugawan sa iyang mga sakop diha sa maong police station.

Nakita sab nga dunay basiyo sa ilimnong makahubog, dunay hugaw sa iro, dunay gipanghayhay nga sinina ug labaw sa tanan upat lang ka polis ang naabtan didto.

Matud pa, 45 ka polis ang nadestino sa maong police station. Hain man diay ang uban?  Posibleng ang uban nag schooling, dunay gi-followup nga kaso, dunay opisyal nga mga lakaw sama sa court hearing ug uban pa

Apan mas maayong imbestigahon kini sa IAS, ilabi na ang kapakyas sa deputy police station chief nga gihulagway nilang 'unattentive' sa ilang mga pangutana. Kay basin wala gyud kini tinuod alamag unsay nangahitabo sa iyang mga ginsakopan.

Ang ingon niini nga talan-awon dili hinuon makita sa tanang police stations, duna gyuy mga limpyo gyud kaayo ug maayong pagkamintenar. Apan mag-agad kini sa kinaiya sa ilang tagsatagsa ka hepe.

Sa training palang sa mga polis, kabahin sa gitudlo sa disiplina ang pagkalimpiyado sa lawas ug sa kung diin sila magpundo, ug ning sitwasyona ang ilang police station.

Si Eleazar na mismo maoy namulong kun unsa nga serbisyong mahatag sa mga ingon niini nga klase sa mga polis ngadto sa katawhang moduol kanila kun bisan gani ilang police station dili man gani nila malimpyohan.