Way angay lalisan

Sa usa sa iyang mga public addresses giangkon mismo ni Presidente Rodrigo Duterte nga way pagkutat ang pangurakot diha sa gobiyerno.

Ug matud niya nga usa ni sa nakapaluya niya maong ganahan na siyang mokanaug sa katungdanan.

Ang pamahayag gihimo ni Duterte agi og tubag sa mga panawagan alang niya nga mopapili pagkabise presidente human sa iyang termino ug sa iyang anak nga si Davao City Mayor Sara Duterte nga mokandidato isip presidente.

Si Senador Manny Pacquiao nga usa sa mga gitan-aw nga mokandidato pagkapresidente sa eleksiyon sunod tuig misaad nga kun siya makahukom paglansar ug modaug isip sunod nga presidente sa nasud, iyang ilusad ang gubat batok sa pangurakot diha sa gobyerno. Gihulagway ni Pacquiao nga nagpabiling lapad ang problema sa corruption sa kagamhanan.

Apan wala makaayon si Duterte niini. Iyang gihagit si Pacquiao pagpresentar og mga ebidensiya sa giingon niining corruption diha sa kagamhanan. Gibaharan pa sa presidente nga kun di mahimo ni Pacquiao ang pagmatuod sa iyang pasangil, iyang ibulgar ang kabakakon niini.

Sa way duhaduha gidawat ni Pacquiao ang hagit ug gipahinumduman si Duterte sa iyang pamahayag diin siya mismo miangkong nagpabilin ug misamot pa ang problema sa corruption.

Gihatagan dayon ni Pacquiao ang presidente og ideya asa siya magsugod pagsusi aron pamatud-an nga hangtud ron wala maputol ang pangurakot diha sa gobiyerno.

Matud ni Pacquiao nga angayang sugdan ni Duterte pagsukitsukit si Health Secretary Francisco Duque hain paingon ang pundo sa gobyerno pagbatok sa nagpadayong pandemya sa COVID-19 dinhi sa nasud.

Dili na angayang lalisan may corruption ba sa gobiyerno tungod kay bisan sa simpleng pagtan-aw sa kantidad sa mga proyekto niini masayod ka nga taga liog ang pagpaburot sa presyo. Kun gusto si Duterte og pruweba mahimo niyang pangayoon ang kopya sa mga annual audit reports sa Commission on Audit sa tanang ahensiya sa gobiyerno.

Didto makit-an sa presidente nga hangtud ron pakyas siya pagtuman sa lain niyang saad atol sa kampanya. Nahinumdom pa tingali mo sa iyang giingon kaniadto nga bisan gamay nga hunghong lang sa pangurakot iyang tangtangon ang opisyal nga hingtungdan? Apan nganong hangtud ron naa paman gihapon ang ubang mga opisyal nga gidudahang nanapi panahon sa pandemiya?