Lapu-Lapu City, little Singapore?

Nganong “little” ra man? Kahinumdom ko sa usa sa mga plano ni Serging, sa dayon niyang balhin sa airport gikan sa Lahug ngadto sa Opon, miingon siya nga  himuon niyang free port ang Opon, puli sa Hong Kong. Kuyaw kaayo nga mga plano. Kadto ra ba si Serging, dinagko ug long term ang iyang mga laraw.

Mao, nga kon nahinayon pa kadto , dili kay nahimo lang kita nga ‘little’ Hong Kong, o ’little’ Singapore, kondili,  colossal ug monumental nga replica o carbon copy sa Hong Kong o Singapore.

Ang kahigayonan wala motugot nga mahitabo kini sa Opon. The rest is history. Apan, mahimo nga atong padayunon ang maong mga damgo.

Hagit kini ni Mayor Ayong Chan. Daghan nang milabay nga mga local administration, gikan sa pagkahimugson sa maong mga damgo, apan nagpabilin kining damgo. Ambot ako na lang tingali ang naghandom niining tanan.

Pag-ingon ni Serging nga iyang dugtongon ang Isla sa Mactan ug mainland Cebu, nagtuo ako nga usa lamang kadto ka damgo. Mga 12 o 15 pa tingali ang akong edad niadtong panahona.

Sila si Presidente Elpidio Quirino ug Serging ang nanguna sa groundbreaking. Although sa inyong nasayran, si Presidente Ferdinand Marcos na ang nakapatuman niini.

Karon, kining napatik sa The Freeman (nakabasa na tingali mo niini): “A P3.7-billion worth of socialized housing  and urban development project will soon rise in Barangay Canjulao, Lapu-Lapu City following the signing of a joint venture agreement between the city government and a private developer.”

Ngiga no, worth P3.7 billion gyud nga proyekto! Motabang ko’g ampo nga madayon kini. Nga kon makahatag na kini’g dakung kalamboan sa Opon, akong hangyuon si Chan nga magpa-JO ko, aron mahibalik ako sa yuta nakong natawhan.

Ang higanting proyekto nag-involved sa 128 ka ektaryang loti nga kon ma-fully developed, ang dakbayan sa Lapu-Lapu mahimo nang ‘little’ Singapore dinhing suoka sa kalibotan.

Ang Joint Venture Agreement gipirmahan nila ni Lapu-Lapu City Mayor Junard Chan ug Engr. Francis Lloyd Chua, presidente sa Premium MegaStructures Inc. (PMI). Sa ato pa, ubos sa partnership sa gobyerno ug private sector. Gasto sa PMI, busa walay katarungan ngano nga dili kini madayon.

Matud ni Chan, ang 25 hectares  i-develop into the socialized housing  ug ang remaining nga 103 hectares maoy ugmaron alang sa commercial ug industrial complex. Ang pagtukod sa socialized housing matapus sulod lamang sa duha ka tuig, ug maka-accommodate kini og balig 3,000, more or less ka beneficiaries.

Mahimo na unya kini nga little city within the city. Mao ra’g Vatican City. Sayo niini, ang Konseho sa dakbayan, mipasar og resolusyon nga nag-authorize ni Chan pagsulod  sa joint venture agreement uban sa PMI.

Very good kay walay nagsupak-supak sa Konseho. Kay kon duna pa, masuko na kaming taga-Opon kanila.

Kahinumdoman nga sa miaging Marso 26, 2003 (kadugay na gud), si kanhi Presidente Gloria Arroyo, mi-isyo og Proclamation No. 346 nga nag-reserve sa 25.24 hectares nga luna sa Barangay Canjulao “for socialized housing and urban development.”

Matud ni Chan, lakip sa makapahimulos niini unya mao ang gatusan nga nagpuyo sa daplin sa kabaybayonan nga namilegro sa baha, ug ang libohan ka urban poor nga kanunay’ng gihulga sa demolition.