EDITORYAL - Pagbarog sa Sugbu

Sa ngalan sa kaangayan ug pagtahod sa otoridad, si Gob. Gwendolyn Garcia mopatuman sa Inter-Agency Task Force guidelines para sa mga overseas Filipino workers (OFWs) ug mga returning overseas Filipino (ROFs) dinhi sa Sugbu.

Sa samang higayon, si OPAV Sec. Michael Dino kinsa misuporta sa gibuhat sa Sugbu gikan pa sa pagsugod sa pandemiya sa miaging tuig mipadayag sab nga dako iyang pagsalig sa desisyon ni Presidente Rodrigo Duterte nga ipasunod gyud ang IATF protocols.

Dili kamahayan kining kalamboan sanglit mibarog gyud si Garcia ug ang Sugbu isip maoy nasayod sa mga panghitabo dinhi sa lokalidad. Apan tungod kay mas labaw man nga otoridad ang presidente, siya gyud ang matuman.

Kining kalamboan nakapahunong aning maisip na nga gamay’ng tensiyon tali sa kaulohan ug sa Sugbu. Sakto si Garcia sa iyang pag-insister sa Cebu protocols pinaagi sa iyang Executive Order No.17 nga gipalig-on sab sa Provincial Ordinance No. 2021-04 ug napamatud-an kini nga epektibo.

Ang gibuhat sa gobernadora usa ka pamaagi sa pagprotihir sa iyang mga konstituwente nga dunay pagtan-aw ug pagbati sab sa pinansiyal nga sitwasyon sa mga OFWs ug ROFs lakip na ang tawhanon nilang panginahanglan tungod sa kamingaw ngadto sa ilang banay.

Mao sab kini ang tumong sa IATF, protektahan ang populasyon gikan sa pagkuyanap og balik sa coronavirus nga Covid-19.

Ang nahitabo man gud niini, daw nagpakitaay ang duha sa ilang kusog ug abilidad nga dili maayong tan-awon sa katawhan, parehas ug tumong apan managlahi ang pamaagi. Karon nga naklaro na ug misaad si Duterte nga sagubangon ang gastos sa mga OFWs ug ROFs samtang sila gikwarantina sa mga hotels suds a napulo ka adlaw.

Nga usa sa mga gitan-aw ni Garcia tungod kay nakadugang kini sa gastos sa mga OFWs ug ROFs nga wala namauli dinhi aron magbakasyon kondili tungod dunay emerhensiya sa pamilya ug uban pa.

Ang gibuhat ni Garcia dili man maisip nga pagsupak-supak kondili ang pagpangita lang og paagi nga magaan-gaan gamay ang kalisdanang nasinati na sa mga nagbiyahe gikan sa abroad sa ilang pagpauli dinhi.