Dakpan ka lagi

Gidayeg nako si Lentoni Sable, ang acting head sa Cebu City Transportation Office, kay siya mismo ang nagpadakop sa usa ka traffic enforcer nga giingong nangilkil.

Si Lentoni mismo ang mi-coordinate sa PNP Criminal Investigation and Detection Group aron nga madakpan ang iyang sakop nga si Roger G. Cadutddot.

May mireklamo nga driver nga gidakop ni Cadutddot nga midemanda kuno’g kwarta kaniya ang traffic enforcer, ug mao nga nahukman ni Lentoni nga ipa-entrap.

Sus, dihang nadakpan na, napasiga ang mga mata sa nagdakop kang Cadutddot kay ang iyang picture nga gibutang sa ID sa CCTO, nagsul-ob man siya og uniporme sa polis, ug “Major” pa ang ranggo!

Kon tan-awon nimo ang ID, makita nga gipirmahan kini ni Mayor Edgar Labella. Nagtuo ko nga dili buang ang mga nagdumala sa City Hall personnel division.

Ang gituohan nako nga ang ID gi-alter ug gipulihan og hulagway nga si Cadutddot nag-uniporme na og sama sa polis.

Sus, daghan pang medals, ug insignia sama sa tsapa sa polis nga major ang iyang ranggo.

Akong awhag sa kapolisan nga pasakaan nila og kaso nga kriminal si Cadutddot. Tun-i kon nagpa-polispolis ba siya nga kalapasan sa Article 177 sa Revised Penal Code, ug ang pagsul-ob og uniporme sa polis nga kalapasan sa Article 179 sa RPC.

Dili man makapanghimakak si Cadutddot nga dili iya ang picture nga anaa sa iyang CCTO ID, kay nakuha man kini gikan kaniya dihang na-entrap siya.

* * *

Daghan pa gihapon ang mga matakboyan og Coronavirus Disease dinhi sa Dakbayan sa Sugbo kada adlaw.

Nagpasabot nga daghan pa ang wala motuman sa mga health protocol nga gimando sa Inter-Agency Task Force (IATF).

Angay tingali nga tan-awon sa mga tinugyanan sa LTFRB ug LTO kay nakabantay ko nga daghang PUJ nga gitugotan na pagpamasahero pagbalik, nagdikitay na ang misakay.

Samtang dunay gibutang nga plastic barriers, apan dikit kaayo ang mga lingkoranan ug wa masunod ang gilatid nga gidak-on sa mata’g lingkoranan.

Mao man bitaw nga mahal ang plitehan karon kay gitugotan sa LTFRB nga mahal ang kolektahong plite kay katunga ra man sa “capacity” ang gitugot nga makasakay.

Apan ang nahitabo karon, nagdasok gihapon ang mga pasahero sa daghang PUJ nga nagbiyahe. Kamo diha sa LTFRB, ug LTO, ayaw mo pagduka-duka.

Naikag ko pagtuki niining isyuha kay diha sa mga PUJ nga nagdasok ang mga pasahero, posibleng may nagtakdanay sa virus, ug kon kini magpadayon, apektado kita sa kabadlongon sa uban.

Sigurado man gyud nga estriktohon ang kategoriya sa atong quarantine.