Nganong ipadakop si Duterte
Di sayon para sa Office of the Prosecutor (OTP) sa International Criminal Court (ICC) ang paghimo og pasiunang imbestigasyon sa mga pasangil sa bangis nga krimen batok ni Presidente Rodrigo kay may laing kapin sa 12,000 ka kaso nga nadawat gikan sa mga indibiduwal, grupo o gobyerno sa sakop nga mga nasud.
Wa katabang sa OTP ang pag-isnab ni Presidente Duterte sa imbestigasyon. Maong wa makaanhi sa Pilipinas ang misyon sa OTP nga maglakip sa mga imbestigador, cooperation advisers ug prosecutors paghipos og mga ebidensiya ug pakigsulti sa mga saksi.
* * *
Kay pinili man sa Assembly of States Parties (ASP) sa ICC, si kanhi Prosecutor Fatou Bensouda (nga taga Gambia) ug deputy prosecutor James Stewart (nga taga Canada) gawasnon sa pagsusi sa mga kaso sa Pilipinas ug ubang kanasuran.
Gitabangan sila sa 380 ka kawani gikan sa 80 ka nasud nga naglakip sa mga eksperto sa balaud, diplomasiya ug international relations ug analysts ug psycho-social specialists. Di hinuon ang nagtumpi rang mga dokumento sa Pilipinas ang gitutokan kay nagtuon sab sa mga pasangil sa war crimes sa Israel ug Afghanistan.
* * *
Karong nangayo na og pagtugot sa Pre-Trial Chamber (PTC) sa ICC paghimo og pormal nga imbestigasyon human nakumbinser ang OTP nga si Duterte maoy responsable sa dul-an sa dekada nga pinatyanay sa Davao ug ubang bahin sa Pilipinas, ang mga huwes mahimong moluwat og arrest warrants.
Ipadakop sa mga huwes si Duterte aron pagsegurong motambong siya sa husay, aron di niya maguba ang mga ebidensiya ug mahulga ang mga saksi sa kaso ug aron di makapadayon paghimo sa gipasangil nga mga krimen.
* * *
Ang arrest warrants batok nilang Duterte ug kaubanan, bisan pa kon malangay sa pagpatuman, di mohupas, magpabiling epektibo hangtod nga buhi pa sila.
Makalikay hinuon si Duterte og priso sa The Hague kon ang mga huwes moluwat lang og summonses to appear.
Nga mahitabo lang kon makumbinser sila nga si Duterte boluntaryo nga motambong sa court proceedings ug di mosabotahe sa imbestigasyon ug sa husay sa kaso.
Pero di niya ma-ulog-ulogan ang mga huwes kon di niya ilhon ang hurisdiksiyon sa korte ug bakwion ang paggawas sa Pilipinas gikan sa ICC.
* * *
- Latest
