EDITORIAL - Ang kurakot ug ang manuborno

Usa ka traffic enforcer ang gidakop sa kapolisan human mismo ang ilang pangulo sa buhatan diin kini nagtrabaho ang misumbong bahin sa mga binuang niini ngadto sa mga motorista.

Ang maong traffic enforcer duha palang ka tuig nasud sa serbisyo diha sa Cebu City Traffic Office.

Matud pa sa report, daghan nang reklamong nadawat ang ilang buhatan bahin sa modus operandi niini nga kilkilan ang mga drayber nga nakalapas sa lagda sa trapiko.

Panagsa ra kaayo kining mga susama niini nga balita nga dunay mga drayber nga gikilkilan ang nisumbong. Kasagaran, kadtong nakahibalo nga nakalapas sila sa lagda ug sa ilang tan-aw dako-dako gyud ang multa sa traffic violations nga ilang nabuhat, tinuyoan man o wala, mas maayong dili nalang maghasol-hasol og bayad ngadto sa CCTO.

Kay mahimo mang makalingkawas sila sa kahasol ug dakong multa kun mobayad sila og P1,000 nga gipangayo sa kurakot nga traffic enforcers.

Apan ang ingon niini nga mga hokus-pokus diha sa kadalanan maoy rason kun nganong daghang badlungong mga drayber.

Mga drayber nga wala manumbaling sa kaluwasan sa ubang motorista nga nigamit sab sa karsada. Paturagas lang pagmaneho nga daw silay nakapanagiya sa dalan.

Posible nga dili lamang kadto maoy mga nabiktima sa maong traffic enforcer ug mas daghan pa tingali ang mipili nga magpakahilom total nakalingkawas na bitaw sila sa mas dakong multa.

Kini nga buhata sama ra og gikunsintir kining mga hiwing binuhatan ug nagsugnod sa mga tigpatuman sa balaod nga mogara pagpangilkil.

Saludo ngadto sa kadagkoan sa CCTO tungod sa ilang aksyon pagsanta aning ilang sakop nga nagbudhi sa panerbisyo.

Magsilbi unta kining leksyon sa uban nilang mga sakop nga nagbuhat sab sama niini ug dili na paabutong may drayber na unyang mobarog ug mosumbong sa ilang pangurakot.

Apan kung buot hunahunaon, way kurakot kun walay manuborno.