Dako ra kaayo ang bawod

Hunyo 20, 2021: Ikanapulog-duha nga Domingo sulod sa tuig

Mga Pagbasa: Job. 38;1,8-11/Sal. 107/2 Cor. 5;14-17/Mk. 4;35-41

Nahinumdom ko kaniadto mga tuig 2006 sa dihang naordinahan akong pari, nadestino ako sa isla nga ginganlan og Carnaza.

Sa maong dapit nahinumdom ko nga buwan kadto sa Disyembre sa dihang akong gi-organized ang paghimo og panglimpiyo sa sam-ang.

Dunay kusog kaayo nga unos taliwala sa bawud ug sama sa ubang mga lalaki kinahanglang mohimo ako og pagbulig aron sa ingon dili matuwang ang pumboat niadtong mga higayona.

Dili tiaw ang maong unos kusog kini apan bisan pa sa kakusog nini padayong nahimong kalmado ang mga matag sakay niadtong mga higayona. Gawas lang tingali kanako nga medyo nakulbaan gyud dili tungod sa mga bawod kondili tungod sa kamatuoran nga ako diay dili maantigong molangoy.

Sa atong kinabuhi dunay mga higayon nga nalumsan kita sa dili tiaw nga mga kabalaka ug kalisang kun ugaling makita nato ang higanteng mga balud sa mga pagsulay ug kalisdanan.

Naanad kita sa bisan unsang sayon ug sa pag-anad nato sa bisan unsang masayon, daw sulad kun impiyerno alang nato kun anaa ang mga kalisdanan nga kanato mihasmag.

Lisud labina kun mahadlok kitang morisgo diha sa paglangoy sa halapad nga lawod sa panlimbasog.

Mao nga tungod sa dakong kalisdanan, nahimo nuon kitang dili makaabante alang sa laing hugna sa pagkinabuhi ug panlimbasog. Hinumdomi no pain no gain matud pa.

Apan angayan natong hinumdoman sa panahon sa dakong panginahangalan ug kalisdanan, dili lamang kita ang nagpas-an niini o ang niatubang niini.

Kuyog nato ang Ginoo kun ugaling anaa lamang kitay pagtuo  nga ang tanan mamahimong madala lamang segun sa panahon nga gitakda.

Ang mahinungdanon batonan lamang nato ang makatarunganong kaisog. Hinumdomi dili lang ikaw o kita ang nag-antos.

Dunay daghan diha nga nag-antos pa kay kanato. Unsay nakapahimo nilang lig-on ug malahutayon? Ang ilang pagtuo nga dunay Dios nga kanila nakig-unong.