_banat
^

Kinutoban sa pagpanghawod

ARANGKADA - Leo Lastimosa (Banat) - June 18, 2021 - 12:00am

Tungod sa popularidad ni Presidente Rodrigo Duterte, bisan sa pagduda nga nahadlok ang kinabag-an pagsukwahi niya kay tingalig silay sunod nga mohagba sa dan, way makababag sa mga plano human mapupos ang iyang termino sa udtong tutok sa Hunyo 31, 2022:

Mopuli sa Malakanyang ang iyang anak nga manalipod niya gikan sa mga kaso sa daghang patay ug lapad nga kawat nga gipasangil sa iyang pamunoan;

Padayong maglibog ang iyang mga kaatbang unsaon pagbalik sa gahom; ug maong

Way laing kadangpan ang katawhan gawas sa paglingiw sa tanan niyang pakauwaw.

* * *

Mahitabo nang tanan kon ibasura sa mga huwes sa Pre-Trial Chamber (PTC) sa International Criminal Court (ICC) ang mga pasangil sa crimes against humanity tungod sa gibanabanang 27,000 nga nangamatay sa iyang kampanya batok sa ilegal nga drugas.

Nga kon tuohan ang bag-o lang niretiro nga prosecutor sa ICC, Fatou Bensouda, di mahitabo tungod sa kalig-on sa mga ebidensiya nga iyang nahipos atol sa tulo ka tuig nga pasiunang imbestigasyon sukad niadtong 2018, nga labihan kamapuslanon kon motugot ang PTC sa pormal nga imbestigasyon batok ni Duterte.

* * *

Dako ang problema ni Duterte nga nakit-an ni Senate Minority Leader Franklin Drilon kon imbestigahon siya sa ICC. Kay pulos makapaapiki ang duha niya ka kapilian:

Kon di moatubang sa husay, di siya makapanalipod sa iyang kaugalingon gikan sa mga ebidensiya nga ipresentar sa mga tagtungod sa mga biktima sa extrajudicial killings ug modako ang kahigayonan nga makonbikto siya; pero

Kon mopada og mga abogado, sama ra nga iyang giila ang hurisdiksiyon sa ICC sukwahi sa tanang balikas ug panghudlat nga iyang naluwatan.

* * *

Umaabot na ba ang adlaw sa panudya ni Presidente Duterte? Inihap na ba lang ang mga adlaw sa iyang kahawod? Nabatyagan na ba niya ang posibleng gibati sa iyang idolo nga si anhing Ferdinand Marcos, nga nagtuong way kinutoban ang iyang diktadura, dihang gitay-og na sa masuk-anong katawhan ang Malakanyang?

Labaw sa kahigwaos sa presidente, hinaut nga makaamgo ang mga polis, mga sundawo ug ubang mga tinugyanan sa balaod nga di sila kinahanglang mosunod sa ilegal nga mga sugo. Kay ang katarung ug kaangayan, bisan unsa kalangay, mao ang mopatigbabaw.

* * *

leolastimosaa@gmail.com

RODRIGO DUTERTE
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with