Walay sala ang hayop

Ang pagpamuhi og mga hayop dili bastabasta kay usa kini ka dakong responsibilidad nga susama sa nag-atiman ka sa suod nga miyembro sa pamilya, dili nga for the sake naa kay kalingawan kon dili dawaton ug hangpon ang tanan.

Apil na niini ang paghatag og maayong pagkaon ug ubang panginahanglan sama sa iro nga gikinahanglan pabakunahan ug unsay angayan himoon alang kaniya.

Niining panahona halos naman seguro ang tanan nasayod na niini, apan dunay dakong kakuwangan ang uban.

Seguro nasobrahan ra usab ang pagpangga sa tawo sa ilang mga pet ug kompiyansa na kaayo nga dili kini makahimo og kadaut kay lagi man’s best friend, yes tinood kana.

Apan kong unsa seguro ka buotan ug ka loyal sa iro ngadto sa iyang amo, extreme usab kaayo kini mo-react sa mga tawo nga dili nila kaila ug tungod sa ilang loyalty andam silang mopasakit sa mga tawo nga feeling nila dunay hulga sa ilang amo.

Busa gikinahanglan mag-amping ang mga tawo ug dili ipakagamay ang mahimo sa hayop, ma kaayohan man o kadautan.

Sama sa nahitabo sa 16-anyos nga dalaga didto sa Oslob kinsa nanginhas lang apan gibugno sa duha ka mga iro nga Rottweiler.

Luoy intawon kaayo ang biktima kay nakaangkon og daghang samad sa kalawasan. Ang delikado kon nahinaykan kadto sa mga iro, wala man siya maintimano niadtong higayona apan delikado siya tungod sa naghulga nga rabbies bisan moingon pa ang tag-iya nga vaccinated na.

Kinsa man ang sad-an ani? Ang iro dili gyud mabasol kay nature kini sa hayop nga moatake gyud, dili pud sala sa biktima kay kinsa man intawon ang gustong magpapaak sa iro.

Diri ta sa tag-iya, miingon siya nga tungod sa kasaba daw sa grupo sa batan-on maong na trigger ang pag-atake sa mga iro.

Dili kini madawat nga katarungan kay kong giayo pa niya sa pagbantay nga dili makagawas o makabuhi ang mga iro dili unta kini makapamaak og tawo.

Lagi moingon ang uban nga responsible pet owner man ko, kutob lang sa imong pero walay labot sa mga tawo sa imong palibot.

Ang pagka-responsible pet owner dili lang kutob sa pagpangga sa mga binuhing hayop kon dili segurohon nga dili kini makasala sa uban.

Kay kong nahitabo pa nga naay pamilya sa dalaga nga kursona kaayo gipatay ang mga iro pareha didto sa kaulohan nga gipatay ang iro kay gipatay sa iro ang mga binuhing manok.

Kini pa kaha nga tawo gyud ang napasipad-an sa mga iro. Unta maseguro ang kaluwasan dili lang sa binuhing mga hayop kon dili ang atong mga isig ka tawo, kay sa ingon mapanalipdan usab ang atong binuhing hayop.

Dinhi matawag ka nga responsible pet owner.