Wa kinahanglanang linigwatay
Tungod sa pamolitika ug kahaw-ang sa liderato, sa laktod nga pagkasulti tungod ni Presidente Rodrigo Duterte, nagpakitaay sa braso imbes mosusi sa siyensiya ang mga naglalis sa mga lagda sa swab testing ug quarantine sa mga pasahero sa international flights nga motugpa sa Mactan Cebu International Airport (MCIA).
Silang Health Secretary Francisco Duque ug kaubanan sa Inter-Agency Task Force (IATF) nisandig gahom sa Malakanyang pagpasimang sa incoming international flights sa MCIA ngadto sa Ninoy Aquino International Airport (NAIA). Samtang ang Kapitolyo sa Sugbo nagpalaban sa mga politiko ug mga abogado.
* * *
Kay wa man katarug sa siyensiya sa lagda sa IATF, kansang mga eksperto sa Department of Health (DOH) ug pribadong sektor nagkauyon nga tungod sa bag-ong variants mas kasaligang swab testing sa ikapitong adlaw human sa pag-abot sa mga pasahero, si Gobernador Gwen Garcia nipalihok sa iyang mga alyado pero:
- Way natampo ang mga kongresista ug mga senador gawas sa pagpaukyab nga mas importante ang pagmenos sa gasto sa mga pasahero kay sa pagpreserbar sa kahimsog sa publiko; ug
- Nabisto ang Integrated Bar of the Philippines Cebu Chapter nga way nakamaohan unsaon pagbadlong ang tinakdanay.
* * *
Sukwahi sa pangangkon ni Garcia nga gipasikad sa siyensiya ang iyang lagda, mas higpit ang swab testing ug quarantine protocols sa mga nasud nga malampusong nibadlong sa bag-ong variants sa COVID-19:
- Ang Centers for Disease Control and Prevention (CDC) sa Estados Unidos nisugo og swab testing sa ikapitong adlaw;
- Ang Belgium ug Saudi Arabia nisugo og swab tests sa una ug ikapitong adlaw; ug
- Ang Vietnam ug Singapore niinat sa quarantine ngadto sa 21 ka adlaw.
* * *
Kon tarung pa lang si Presidente Duterte, wa unta niya tugoti ang linigwatay sa IATF ug mga politiko nga nakadugang sa kahasol sa naapiki nang daan nga Overseas Filipino Workers (OFWs) ug Returning Overseas Filipinos (ROFs).
Pero imbes gamiton ang gipanghambog nga lig-ong liderato, gi-ulog-ulogan niyang duha ka nagkasungi nga habig kay: Una, di siyang kasukwahi sa iyang tinudlo nga retiradong mga heneral sa IATF; ikaduha, di siyang ka-risgo nga maadto sa pikas ang tulo ka milyon ka boto sa Sugbo sa piniliay sa 2022; ug ikatulo, wa siyay interes nga makasabot unsay gilalisan.
* * *
- Latest
