EDITORYAL - Implikasyon kun magdaginot

Nagkatinubagay ang duha ka mga konsehal sa Dakbayan sa Sugbo bahin sa mga job order employees sa siyudad. Kining tanan tungod sa budget sa pagpasweldo kanila. Si Konsehal Alvin Dizon nisugyot nga menusan ang pag-hire og mga job order employees sa city hall aron makadaginot ang siyudad sa budget para sa ilang suholan.

Buot ni Dizon nga menus ang gastos sa siyudad ug i-maximize ang trabaho sa mga job order employees.

Apan si Konsehal Niña Mabatid supak niini. Gihagit niya si Dizon sa pagsuroy sa mga barangay ug sa city hall ug tan-awon ang kahago sa mga JOs sa trabaho.

Makamenus man tuod ang siyudad  paggahin og pundo sa suholan sa matangtang nga mga JOs, sa tawhanong panglantaw makalululuoy ang mawad-an og trabaho, ang uban kanila dunay mga pamilyang nagsalig sa ilang sweldo gikan sa siyudad.

Ang madaginot nga pundo magamit pa sa siyudad sa ubang mga importanteng proyekto o palitonon.

Apan maayo sab tingali tan-awon og maayo kun maapektahan ba ang batakang serbisyo sa siyudad sa mga konstituwente niini kun gamay nalang ang mga JOs.

Tungod kay kun gamay ra ang nagbuhat sa mga trabaho, ang mahitabo daghan gyung buluhaton nga kinahanglang saw-on sa mga mahibiling kawani aron padayon ang operasyon.

Kaning mga JOs dili raba tanan nadestino sa mga opisina sa nagkadaiyang departamento sa siyudad ug sa mga buhatan sa mga konsehal aron motabang sa pagpadali sa mga transaksyon ug serbisyo.

Apan mas daghan sa mga JOs ang naa sa field gikan sa emergency response, hasta sa pagpanglimpyo sa kadalanan, pagkuykoy sa mga kanal, paghakot sa mga basura , traffic  ordinance enforcement, karon duna pay health protocol enforcement ug daghan pang uban.

Ang duha parehong adunay maayong punto ug makatarunganon ang basihan sa ilang mga baruganan. 

Walay sayop sa duha apan mas maayo unta og kining ilang pagtinubagay pinaagi sa social media adto nilang himuon sud sa sesyon sa Konseho.

Isentro unta nila ang ilang mga baruganan sa kaayohan sa mas kinabag-an tungod kay duna kini mga implikasyon unya nga dili maayo para sa ilang mga konstituwente.