Lokal nga EO batok IATF nga palisiya

Tumanon sa Mactan Cebu International Airport Authority (MCIAA) ang Executive Order ni Cebu Governor Gwendolyn Garcia ug ang odinansa sa lalawigan sa Sugbo nga nagmando sa pagpaubos dayon sa swab test sa mga Overseas Filipino Workers (OFW) ug Returning Overseas Filipinos (ROF) nga mangabot sa tugpahanan sa Mactan. Sukwahi kini sa palisiya nga gipatuman sa Inter-Agency Task Force (IATF) nga nagmando sa tanan nga mga OFW ug ROF sa pagpaubos sa swab test human na sa pito ka adlaw.

Tungod kay paaboton pa ang pito ka adlaw sa dili pa ipaubos sa swab test ang mga OFW ug ROF gikinahanglan nga mopuyo sila sulod sa maong adlaw sa mga hotels nga gihimong wuaratine facilities alang kanila.

Walay problema niining maong palisiya ang mga OFW tungod kay ang gobiyerno man ang moabaga sa bayranan sa hotel nga ilang pagapoyan. Ang problemado niini mao ang mga ROF tungod kay sila ang moabaga sa bayranan sa ilang pagpuyo sa hotel.

Gustong tabangan sa gobernadora ang kahimtang sa mga ROF nga namauli aron magbakasyon sulod sa mubo nga panahon apan  na walay pulos tungod kay dili man dayon sila makaadto sa ilang gustong padulngan alang sa paglingaw-lingaw tungod kay i-quarantine pa man.

Gusto sa gobernadora nga sa pag-abot sa mga OFW ug ROF ipaubos dayon sa swab test aron kun mag negatibo padritsohon na sila sa ilang distinasyon pero pag-abot sa pito ka adlaw ipaubos na pud sila sa swab test sa lugar nga sila mipuyo. Niining paagiha makadaginot ang gobiyerno nga mogasto sa hotel accomodation sa mga OFW ug ang mga ROF nga personal nga mogasto sa bayranan sa hotel nga sila I-quarantine.

Misangko sa panaglalis tali sa gobernadora ug IATF ang EO ug ordinansa ug palisiya sa IATF nga nakapaaghat sa gobernadora sa pagpakigkita ni Presidente Rodrigo Roa Duterte aron mapasabot niini ang iyang tumong.

Murag nagmadaugon ang gobernadora tungod kay hinay na ang angal sa IATF dihang gipahibawo sa MCIAA nga maoy ilang sundon ang EO sa gobernadora ug ang ordinansa sa lalawigan sa Sugbo.