Suporta nagkadaghan

Nag-anam og kadaghan ang mga mipadayag og suporta sa protocol sa lalawigan sa Sugbo alang sa mga mangabot nga mga overseas Filipino.

Usa sa kusganong mipaabot sa iyang suporta sa polisiya ni Gobernador Gwendolyn Garcia mao mismo si Senate President Tito Sotto. Ang iyang kauban nga si Senador Sonny Angara mipaabot sab sa iyang suporta sa gobernador taliwa sa di makatarunganon nga mga lagda sa Inter-Agency Task Force (IATF) nga naghatag og kalisod sa mga Sugboanon nga mangabot gikan sa laing nasud.

Gawas sa duha ka mga senador, walo ka mga kongresista sa Sugbo mipirma sab og manifesto nga nag-awhag sa IATF nga respitohan ang local autonomy sa probinsiya. Ang mga namirma sa manifesto naglakip nilang Kongresista Eduardo Gullas Sr. sa unang distrito, Wilfredo Caminero sa segundo distrito, Pablo John Garcia sa tirsero distrito, Janice Salimbangon sa cuarto distrito, Duke Frasco sa quinto distrito, Lolipop Ouano-Dizon sa sixto distrito, Peter John Calderon sa ika-pitong distrito, ug Sonny Lagon sa Ako Bisaya Partylist.

Kagahapon ang Integrated Bar of the Philippines (IBP) Cebu Chapter mipalabang sab og resolution nag-awhag sa IATF nga sagupon ang protocol sa probinsiya ug maoy ipatuman sa tibuok nasud aron mahiusa ang mga lagda alang sa manguli nga mga Filipino gikan sa gawas sa nasud.

Simple ug praktikal ang lagda nga gipatuman sa probinsiya sa Sugbo pinasikad sa executive order sa gobernador ug sa ordinansa nga giaprobahan sa Hunta Probinsiyal sa Sugbo.

Ang tanang mangabot nga mga Filipino gikan sa byahe sa gawas sa nasud ug kadtong mga manguli nga mga overseas Filipino workers ipaubos sa swab test inig-abot nila sa Mactan Cebu International Airport.

Kun negative ang resulta mamahimo na silang mopauli sa ilang pinuy-anan human sa tulo ka adlaw ug adto sa ilang panimay ipadayon ang quarantine. Samtang kadtong magpositibo mopaubos sa naandang protocols.

Kadtong tugotan nga makauli sa ilang panimay, ipaubos sila pagbalik sa swab test human sa pito ka adlaw. Sa ingon niini makaminus sa gasto sa bayranan sa mga hotel nga maoy gihimo quarantine facility sa gobiyerno.

Apan supak niini ang IATF, ang ilang gihimo aron dili kapamugos si Garcia sa lagda sa probinsiya, ilang gipatipas ang tanang international flights alang sa Sugbo ngadto sa Manila. Ang mga pasahero intawn maoy naapeke.

Niining gihimo sa Malakanyang nga paglisud-lisud, siguradong dili ni malimtan sa mga Sugboanon sa eleksiyon sunod tuig. Ug ambot makombinsir ba ni Presidente Rodrigo Duterte ang gobernador nga paluyohan ang iyang ituboy pagkapresidente human niining ilang gihimo.

Basin nalimtan sa Malakanyang unsa ka adunahan sa boto ang Sugbo nga mamahimong makapadaog og kandidato pagkapresidente ug si kanhi presidente Gloria Macapagal-Arroyo maoy buhing saksi niini.