Malakanyang mipatikangkang

Mipagawas og bag-ong kamandoan ang Malakanyang nga pinirmahan ni Executive Secretary Salvador Medialdea. Nia, pipila ka tipik:

“Enforce the current testing and quarantine protocols approved and issued by IATF applicable to inbound international travels in all ports of entry regardless of any specific protocols that may be issued by Local Government Units (LGU) to the contrary.”

Tanang mangunguliayng Overseas Filipino Workers (OFW) ug Returning Overseas Filipinos (ROF) dili na makaderetsog tugpa-kanaog sa Mactan Cebu International Airports (MCIA) sugod Mayo 29 hangtod Hunyo 5, 2021.

Sa Ninoy Aquino International Airport na sila palandinga. Pamaaging mipasamot sa masinating kabug-at nga maagian sa OFW ug ROF dinhi sa ato.

Kay imbes direkta sa Cebu ilang tugpahan, ihapit pa man sila sa Manila.

Ambot, nganong sadista kaayo atong gobiyerno?  Nganong hilig mopapas-ag krus nga bug-at na kaayo daang gipas-an sa atong OFW ug ROF?

Ikaduha, makalibog. Nganong atong kagamhanan gusto gyong mogastog dako, inay mosagop-mangitag mga alternatibong paaging epektibong makatabang pagsulbad sa giatubang tang suliran aron kita makadaginot?

Mga maalamong scientist/doktor nga mogamag anti-vaccine para COVID-19, naa ta niini. Pero unsay gibuhat sa gobiyerno? Imbes suportahan sa DOH ug FDA, gilisodlisod ug giharangan hinuon.

Ultimong executive order sa LGU sama sa EO 17 ni Cebu Gov. Gwen Garcia nga makagaangaan sa dughan ug bulsa sa mga OFW, ROF ug atong gobiyerno, mismo, gipangitaag paagi sa Malakanyang nga kini hingpit mahunong. Busa, dili na mapuslan. Ngano man?

Para asa ba diay ang Malakanyang? Para ba sa katawhan o sa pipila lamang ka mga hipokritong anino, kinsa sa tago ang ilaha rang kaugalingong bolsa ang gibusog?

Sa EO 17 ni Gob. Gwen, namatikdang hinayhinay nang nakalupad ang ekonomiya sa Sugbo nunot sa nakontrolar nga kamangtas ni COVID-19.

Apan subo palandungon, nga ning kasugoang gipabuhagay sa Malakanyang, diin hingpit nagmando nga mao gyoy sundon word for word sa tanang LGU ang unsay health protocols sa IATF, sama ra nga gibalian og pako ang nakahuyad na untang Sugbo.

Daghang Sugboanon ang wala makaayon niining hukom sa Malakanyang.

Kay ikatandi kini sa usa ka higanteng mipatikangkang sa samarang tawo, kinsa puwerting paningkamot nga makakatkat sa itaas aron dili mahulog sa mga kamot sa kaaway.