Wala kadulot sa Probinsyana

Bisan pa man og nagpasulabi ang garbo sa mga naglangkob sa IATF ilabi na ni DOH Secretary Francisco Doque nga ipatuman gyud ang Whole-of-Nation approach sa pagdawat sa mga OFWs ug Returning Overseas Filipinos ROFs pinasubay sa ilang omnibus guidelines, mipatigbabaw gyud gihapon ang provincial ordinance sa Sugbo.

Bugtong ang Sugbo lang ang nakahimo sa pagbarug nga wala magpadektar sa palisiya nga gustong iimplementar sa mga naglangkob sa IATF.

Wala supaka ni Governor Gwen Garcia ang palisiya kon dili gi-innovate lang niya kon unsay angay ug haum nga buhaton nga epektibo dinhi sa Sugbo.

Dili lang bintotbintot nga lakang ang gipatuman sa Cebu kondili produkto kini sa pagtuon dili lang sa isyu sa COVID-19 kondili apil ang kinabuhi ug panginabuhi sa mga tawo.

Gisuwayan siya sa paggawong sa mga dagkong opisyal ilabi na dihang nag atubang sila atubangan kang Presidente Duterte.

Apan kompleto sa bawon ang team Cebu lakip na ang data sa COVID-19 ug giunsa sa pagtoon ug pagpatuman ang mga palisya nga epektibo.

Gimandoan sa pangulo si Doque nga ton-an ang proactive nga pamaagi ni Gov. Gwen apan tataw nga bitter man si Doque kay didto pa lang miingon naman nga dili nila ipatuman ang local policy sa Cebu.

Natandog ang ilang garbo kay sila gud ang gisangonan apan nalabwan man sa probinsyana nga dili pa gyud doktor.

Gustohon man sa IATF nga gawngan ang  Sugbo apan dili nila mahimo kay naisahan usab sila sa gubernador kay ang executive order niya gipalig-on man pinaagi sa provincial ordinance, nga mao ang fundamental law of the province, wani gyud ang guidelines nga ipatuman ni Doque.

Nakatunog lang gyud sila sa probinsyanang gobernador nga molabok gyud basta mabutang sa alanganin ang iyang mga piso, nakasimo ang Sugbo tungod kay makita man usab ang kamatuoran.

Ang kabalak-an karon sa mga sinaligan sa kaulohan nga basin og sundogon kini sa ubang mga LGU kay nahimo gani sa Cebu mahimo pud nila.

Misamot ka lig-on kay suportado sa walo ka kongresista ang palisiya sa Sugbo diin gipadayag ang pagrespeto sa balaud ug sa local autonomy.