EDITORYAL - Dili kompetisyon

Kinsa man diay ang nasuhito sa sud sa panimalay, dili ba ang mismong tagbalay? Mao ra sab kini sa sitwasyon sa nagkadaiyang mga local government units sa ilang tagsa-tagsa ka hurisdiksyon.

Ang LGUs sama sa ra usa ka balay nga diin dunay amahan nga maoy mayor o gobernador nga maoy modumala kauban sa ilang mga lokal nga magbabalaod sama sa mga konsehal ug board members.

Kung dunay problema sa balay sama sa pundir nga suga, depektosong gripo ug uban pa wala kini mahibaw-i sa barangay.

Mahimong pangitaan sa tagbalay og pamaagi o solusyon ang problema nga ila-ila ra ug di na kinahanglang ang tibuok lungsod maoy masayod kun unsaon kini pagsulbad.

Sama sa nahitabo karon sa Sugbo sa kaugalingon niining polisiya bahin sa mga mangabot nga mga overseas Filipino workers (OFWs) ug ang mga mamauli nga mga Pilipino o returning overseas Filipinos (ROF) diha sa Mactan Cebu International Airport.

Karong dunay pandemiya sa Covid-19 ang nasudnong kagamhanan pinaagi sa giumol niining Inter Agency Task Force (IATF) ug maoy gitahasan sa paghimo og mga lagda nga ipatuman aron batokan ang pagkatap sa Covid-19.

Apan nakita kadugayan nga dili tanang guidelines sa IATF haom sa tanang panahon o sitwasyon base sa kahimtang sa nagkadaiyang LGUs mao nga kinahanglang modesider ang mga lokal nga otoridad paghimo og kaugalingong polisiya.

Dili ba ang tumong sa guidelines sa IATF mao man ang pagkontrol, pagpakgang ug pagtutok sa pandemiya aron dili kini makapanakod sa kinabag-ang populasyon?

Mao man sab kini ang gihimo ni Gob. Gwendolyn Garcia, apan mas dili kaayo hasol ug komplikado sa mga OFWs ug ROFs. Isip maoy taga Cebu, mas nasayod siya sa sitwasyon kaysa sa mga taga IATF nga toa sa Manila.

Dili kini kompetisyon kun kinsay mas gamhanan, ang IATF ba o ang mga lokal nga leaders sa LGUs nga gibotaran sa mga tawo.

Ang importante niini dili kun “giunsa ni kinsa” kondili mao ang resulta base sa nakitang haom ug epektibong pamaagi pagkontrol sa pagkatap sa sakit sa usa ka sitwasyon.